ԵՐԵՎԱՆ, 20 սեպտեմբերի./Նովոստի-Արմենիա/. Ադրբեջանի նախագահ Ալհամ Ալիևը բացասաբար է գնահատել ղարաբաղյան հակամարտության կարգավորման շուրջ բանակցությունների ներկա վիճակը և համարում է, որ դրանք իրականում դադարել են, հաղորդում է ՏԱՍՍ-ը
«Ես բացասական եմ գնահատում բանակցային գործընթացի ներկայիս վիճակը: Համարում եմ, որ արդբեջանցի ժողովուրդը լիովին համաձայն է ինձ հետ: Բանակցությունները փաստացիորեն չեն ընթանում»,- հայտնել է Ալիևը տեղական հեռուստաալիքների հետ զրույցում:
Ալիևը նշել է, որ իր երկիրը «իմիտացիայի համար չի մասնակցի խորհրդակցություններին»:
«Դա չի նշանակում, որ մենք հրաժարվում ենք բանակցություններից»,- ընդգծել է նա:
Միաժամանակ, ըստ Ադրբեջանի նախագահի, քննարկումներին մասնակցելը հանուն տեսանելիության, ըստ էության, տեսանելիություն էլ կլինի:
Նրա տեսակետից՝ Հայաստանի ղեկավարությունը «փաստացիորեն խախտել է բանակցային գործընթացը»:
«Քանի որ նրանց անհեթեթ հայտարարությունները, սադրիչ քայլերը անիմաստ են դարձնում բանակցությունները»,- հավելել է Ալիևը:
Հակամարտության պատմությունը
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։ 1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։
Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։ Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ` հակամարտության խաղաղ կարգավորման ուղղությամբ` ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան։-0-
