ԵՐԵՎԱՆ, 21 ապրիլի./Նովոստի–Արմենիա/. Ղարաբաղյան հակամարտության կարգավորման բանակցությունների շրջանակում ակտիվորեն քննարկվում է փուլային մոտեցման վրա հիմնված կարգավորման նախագիծ, որն առաջարկվել է 2019թ.–ի ապրիլի 15–ին Մոսկվայում, երեքշաբթի հայտարարել է ՌԴ ԱԳ նախարար Սերգեյ Լավրովը։
«Կան Մադրիդյան սկզբունքներ, կան փաստաթղթեր, որոնք պատրաստվել են Ռուսաստանի կողմից 2010–2011թթ.–ին, այսպես կոչված «Կազանյան փաստաթուղթը», և կան նախագծեր, որոնք տարածվել են Մոսկվայում 1 տարի առաջ` նախորդ տարվա ապրիլին, Ռուսաստանի, Հայաստանի և Ադրբեջանի ԱԳ նախարարների հանդիպման ժամանակ, որին մասնակցել են նաև համանախագահները, և դրանք հիմա ակտիվորեն քննարկվում են։ Այդ փաստաթղթերը նախատեսում են կարգավորման առաջխաղացում փուլային մոտեցման հիման վրա», – ասել է նա «Գորչակովի հիմնադրամի» կողմից կազմակերպված առցանց քննարկման ժամանակ։
Լավրովի խոսքով, փաստաթուղթը նախատեսում է առաջին փուլում առավել ակտուալ խնդիրների լուծում, ԼՂ–ի շուրջ մի շարք շրջանների ազատում և տրանսպորտային, տնտեսական և այլ հաղորդակցությունների ապաարգելափակում։
«Վստահ եմ, որ երբ մենք գանք այդ փաստաթղթերի ստորագրման որոշմանը, դա կլինի կարևորագույն քայլ ՄԱԿ–ի ԱԽ–ի բանաձևերի կատարման ճանապարհին, որոնք պահանջել են դադարեցնել պատերազմն ու պայմանավորվել։ Պատերազմը մենք դադարեցրեցինք, հիմա պետք է պայմանավորվել, ինչին մենք ձգտում ենք` որպես ԵԱՀԿ ՄԽ համանախագահներ», – ասել է նա։
Լավրովն ընդգծել է, որ ՄԱԿ–ի ԱԽ–ի` Լեռնային Ղարաբաղի շուրջ տիրող իրավիճակին վերաբերող բանաձևն ընդունվել է մարտական գործողությունների թեժ պահին, և դրանք նախատեսում էին առաջին հերթին ռազմական գործողությունների դադար և կարգավորման ձեռք բերում։
«Դրանց մեջ, այո, հաստատվում էր Ադրբեջանի տարածքային ամբողջականությունը, սակայն դրանք նաև պահանջում էին դադարեցնել պատերազմն ու սկսել բանակցությունները։ Դրանից հետո բազմաթիվ անգամ բանակցել ենք, եղել են պայմանավորվածություններ Քի Վեսթում 2001թ.–ին, հետագա պայմանավորվածություններ տարբեր ձևաչափերով` ինչպես Ղարաբաղի մասնակցությամբ, այնպես էլ առանց նրա։ Հիմա էլ հաստատվել է բանակցությունների ձևաչափը` Բաքու–Երևան–ԵԱՀԿ ՄԽ համանախագահներ և ԵԱՀԿ–ի գործող նախագահի ներկայացուցիչ», – ասել է նա։
Ինչպես նշել է ՌԴ ԱԳ նախարարը, ԵԱՀԿ Մինսկի խմբի ձևաչափն օգտակար է, դրանում մարմնավորվել է ՄԱԿ–ի Անվտանգության Խորհրդի պահանջն այն մասին, որ պետք է դադարեցնել պատերազմն ու սկսել պայմանավորվել։–0–
