Երևանում 38–ամյա տղամարդը կրակել է շների ուղղությամբ, բայց գնդակը դիպել է հարևանի «Լեքսուսին» (ՎԻԴԵՈ)

ԵՐԵՎԱՆ, 7 ապրիլի./Նովոստի–Արմենիա/. Նախօրեին կրակոց էր հնչել Երևանում։

Ինչպես հաղորդում է ՀՀ ոստիկանության մամուլի ծառայությունը, ժամը 12-ի սահմաններում, ոստիկանության Նոր Նորքի բաժնում ահազանգ ստացվեց, որ գիշերը Դավիթ Մալյան փողոցի շենքերից մեկի մոտ կրակոցի ձայն է լսվել: Դեպքի վայր մեկնած օպերատիվ-քննչական խումբը պարզեց, որ գիշերը հրազենից կրակել են աղբամանի ուղղությամբ, սակայն գնդակը դիպել է բնակիչներից մեկի «Լեքսուսին»:

Դեպքի վայրի զննությամբ հայտնաբերվեց 9 մմ տ/չ պարկուճ:

Նոր Նորքի քրեական հետախույզների բացահայտման աշխատանքներին միացան ոստիկանության Երևան քաղաքի վարչության քրեական հետախույզները: Համատեղ միջոցառումներով օպերատիվ տվյալներ ստացվեցին, որ կրակողը նույն փողոցի 38-ամյա մի բնակիչ է:

Իրավապահների բացատրական աշխատանքի շնորհիվ կասկածվողը ապրիլի 6-ի գիշերը ներկայացավ ոստիկանության Նոր Նորքի բաժին:

Նա խոստովանել է, որ ինքն է կրակել շների ուղղությամբ՝ նրանց հնարավոր հարձակումը կանխելու համար։ Տղամարդը ներկայացրել է նաև «Բերետա» տիպի 9 մմ տ/չ ատրճանակ, որով պարգևատրվել էր անցած տարի։

Նշանակվել է փորձաքննություն: Հանգամանքները պարզվում են:–0–