ԵՐԵՎԱՆ, 10 մայիսի./Նովոստի–Արմենիրա/. Նախօրեին հայտնի դարձավ, որ Դեբեդ գետում ողբերգական պատահարի հետևանքով մահացել է հայտնի հաղորդավարուհի Արմինե Ճաղարյանը։
Ինչպես
հաղորդել էինք ավելի վաղ, գետում ռետինե նավակը շրջվել է, Արմինեին դուրս են բերել գետից անգիտակից վիճակում։ Նա տեղափոխվել է Ալավերդու ԲԿ, որտեղ արձանագրվել է Արմինեի մահը։
Ինչպես հայտնի է դարձել shamshyan.com–ին, Վանաձորի բնակիչ, 32-ամյա Գևորգ Վարդանյանը, ով աշխատում է «Ռաֆթինգ Արմենիա Լոռի» ՍՊԸ-ի տնօրեն, քննչական մարմնին հայտնել է, որ նույն օրը ժամը 15:30-ի սահմաններում վերոնշյալ ընկերության կողմից կազմակերպված ջրային ռաֆթինգի ժամանակ, «Ճամպրուկս ու ես» հաղորդաշարի շրջանակներում իրականացվող նկարահանումների ընթացքում, Դեբեդ գետի Քոբայր-Սանահին կայարան հատվածի 3-րդ կմ-ում գետի վարարած լինելու պատճառով փչովի ռետինե նավակը շրջվել է, ինչի հետևանքով նավակի մեջ գտնված ռաֆթինգի 4 և նկարահանում իրականացնող 3 մասնակիցներն ընկել են գետը, որոնցից 6-ը (որոնց տվյալները պարզվում են) իրենց ուժերով կարողացել են դուրս գալ գետից, իսկ Ա. Ճաղարյանին շուրջ 10 կմ գետը տարել է: Նրան հայտնաբերել են փրկարարներն ու Լոռու մարզի պարեկները Դեբեդ գետում՝ Սանահին կայարան թաղամասին հարակից հատվածում և անգիտակից վիճակում մոտեցրել են շտապօգնության մեքենային:–0–
