ԵՐԵՎԱՆ, 1 հուլիսի. /Նովոստի–Արմենիա/. ԱՄՆ-ում 19-ամյա աղջիկը սպանել է իր զուգընկերոջը Youtube-յան տեսանյութ նկարահանելիս։
Մոնալիզա Պերեսը և իր 22-ամյա ընկեր Պեդրո Ռուիզը Youtube-յան էջ ունեն, որտեղ տարբեր տեսակի փորձերի տեսանյութեր են հրապարակում:
Այս անգամ նրանք որոշել են նկարահանել իրենց ամենավտանգավոր տեսանյութը՝ «ավելի շատ դիտորդներ ունենալու» նպատակով:
Պեդրոն պետք է գիրք դներ իր կրծքավանդակին, իսկ նրա ընկերուհի Մոնալիզան պետք է կրակեր գրքի վրա:
Երիտասարդները կարծում էին, թե գիրքը թույլ չի տա, որ փամփուշտը վնասի Պեդրոյին: Սակայն տեսանյութը նկարելու ժամանակ, երբ Մոնալիզան կրակել է Պեդրոյի վրա, փամփուշտը մխրճվել է նրա կրծքավանդակի մեջ, և Պեդրոն տեղում մահացել է, գրում է armtimes–ը։
Загружается новость ... "Лево"
«Ես և Պեդրոն, ամենայն հավանականությամբ, պատրաստվում ենք նկարել երբևիցե ամենավտանգավոր տեսանյութերից մեկը: Սա իր գաղափարն է, ոչ թե իմը»,- դեպքից մեկ օր առաջ գրել է Մոնալիզան:
Աղջիկը, ով հղիության 7-րդ ամսում է, 911 է զանգահարել և հայտնել, որ ինքը պատահմամբ կրակել է ընկերոջ վրա: Նա ձերբակալվել է և մեղադրվում է չկանխամտածված սպանության մեջ:
Մոնալիզան նշել է, որ դա եղել է Պեդրոյի մտադրությունը, ով գիրքը դրել է կրծքին՝ համոզելով, որ ինքը կրակի նրա վրա:
Աղջիկը նաև ասել է, որ Պեդրոն նույնիսկ մի քանի այլ գրքեր է ցույց տվել իրեն, որոնց վրա փամփուշտի հետք է եղել, ու ասել է, որ ինքը փորձել է դա անցյալում և ստացվել է:
Նշվում է, որ Մոնալիզա Պերեսին սպառնում է մինչև 10 տարվա ազատազրկում և 20 հազար դոլարի տուգանք:-0-
