Պարզվել է ոստիկանության Արաբկիրի բաժնում ռումբի մասին կեղծ ահազանգի հեղինակը
ԵՐԵՎԱՆ, 19 դեկտեմբերի./Նովոստի-Արմենիա/. Պարզվել է ոստիկանության Արաբկիրի բաժնում ռումբի մասին կեղծ ահազանգի հեղինակը, հաղորդում է ՀՀ ԱԱԾ-ն:
«ՀՀ ազգային անվտանգության ծառայության կողմից ձեռնարկված օպերատիվ-հետախուզական միջոցառումների արդյունքում հայտնաբերվել է դեկտեմբերի 17-ին ՀՀ ոստիկանության Արաբկիրի բաժնում ռումբ տեղադրված լինելու մասին ՀՀ ոստիկանության Կենտրոնականի բաժին կեղծ ահազանգ կատարած անձը»,- նշվում է գերատեսչության հաղորդագրության մեջ:
Մասնավորապես, պարզվել է, որ այն կատարել է Երևան քաղաքի բնակիչ, 1985 թ. ծնված Կ.Ս.-ն:
Առերևույթ հանցագործության դեպքի առթիվ կատարվում է նախաքննություն:
Հիշեցնենք, որ դեկտեմբերի 17-ին, ժամը 12:36-ին «911» ծառայություն տեղեկություն է հաղորդվել, որ Երևանի Մամիկոնյանց փողոցի թիվ 1 հասցեում գտնվող ոստիկանության շենքում պայթուցիկ սարք է տեղադրված: Տվյալ տարածքում փրկարարների և ոստիկանության աշխատակիցների կողմից տեղազննման արդյունքում պայթուցիկ չի հայտնաբերվել:-0-
