Սարսափելի ավտովթար Աբովյանում. ընտանիքի 5 անդամներ մահացել են, 15–ամյա աղջիկը ծայրահեղ ծանր վիճակում է (ՖՈՏՈ)

ԵՐԵՎԱՆ, 21 փետրվարի./Նովոստի–Արմենիա/. Նախօրեին՝ փետրվարի 20-ին, խոշոր ու ողբերգական ավտովթար է տեղի ունեցել Կոտայքի մարզում:

Shamshyan.com–ի հաղորդմամբ, ժամը 20:00-ի սահմաններում, Արզնու խճուղում՝ Աբովյան քաղաքի սկզբնամասում, բախվել են BMW X5, Opel և ՎԱԶ-2106 մակնիշի ավտոմեքենաները:

Վթարի հետևանքով 5 մարդ տեղում մահացել է:



Կայքի հաղորդմամբ, Կոտայքի բաժնի ոստիկաններն ու քննչական բաժնի քննիչները պարզել են, որ 06-ը վարել է Չարենցավան քաղաքի բնակիչ, 46-ամյա Վ. Պ–ն, ուղևորները եղել են՝ Չարենցավան քաղաքի բնակիչներ, 40-ամյա Ա.Պ.–ն, 17-ամյա Վ.Պ–ն, 65-ամյա Գ.Պ.–ն, Բյուրեղավան քաղաքի բնակիչ, 34-ամյա Մ.Գ–ն: Վերջիններս տեղում մահացել են, իսկ 06-ի մյուս ուղևորը` 15-ամյա Վ.Պ.–ն «ծայրահեղ ծանր» ախտորոշմամբ տեղափոխվել է «Աբովան» բժշկական կենտրոն, որտեղից էլ Երևանի «Սուրբ Աստվածամայր» բժշկական կենտրոն:

Մահացածները ընտանիքի անդամներ էին:

Պարզվել է նաև, որ Opel-ը վարել է Բյուրեղավան քաղաքի բնակիչ, 60-ամյա Վ. Կ–ն։

Վթարից որոշ ժամանակ անց ոստիկաններին է ներկայացել Բյուրեղավան քաղաքի բնակիչ, 53-ամյա Ս.Դ–ն և հայտնել, որ BMW X5-ը ինքն է վարել: Կայքի տեղեկություններով՝ ոստիկաններն ու քննիչներն ունեն կասկածներ, որ BMW-ն նա չի վարել:

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:–0–