ԵՐԵՎԱՆ, 19 հունվարի. /Նովոստի–Արմենիա/. Իրանի նկատմամբ պատժամիջոցների վերացումը թույլ է տալիս իրականացնել Հայաստանի հետ նախկինում նախատեսված բոլոր ծրագրերը, երեքշաբթի լրագրողների ասաց ՀՀ ԳԱԱ Արևելագիտության ինստիտուտի ավագ գիտաշխատող, իրանագետ, Գոհար Իսկանդարյանը:
Հունվարի 17-ին ԵՄ-ն և ԱՄՆ-ը վերահաստատեցին Իրանի նկատմամբ տնտեսական և ֆինանսկան պատժամիջոցների վերացման մասին իրենց պատրաստակամության մասին: Այդ հայտարարությունը հնչել է այն բանից հետո, երբ ՄԱԳԱՏԷ-ն միջուկային գործարքների պայմանների առնչությամբ հաստատեց Թեհրանի կողմից բոլոր պահանջների կատարման մասին:
«Պատժամիջոցների վերացումից հետո Իրանի համար հասանելի են դառնում նախկինում սառեցված խոշոր ֆինանսական ($50 մլրդ.) միջոցները, և արդեն երկիրը կարող է իրականացնել նախատեսված բոլոր ծրագրերը, որոնք կանգնեցվել էին ֆինանսական խնդիրների պատճառով»,-նշեց Իսկանդարյանը:
Նա ընդգծեց, որ առաջին հերթին կավարտվի Մեղրիի ՀԷԿ-ի շինարարությունը, որը ձգձվել է Իրանի ֆինանսկան խնդիրների պատճառով:
«Հիմա մենք հստակ կարող ենք ասել, որ այս ծրագիրը կարելի է ավարտված համարել»,-ասաց Իսկանդարյանը:
Նա նշեց, որ պատժամիջոցների վերացումից հետո, արևմտյան խոշոր ընկերությունները «հերթ են կանգնել» Իրանի հետ նոր պայմանագրեր կնքելու համար: «Հայաստանը, ցավոք, նման միջոցներ չունի, որպեսզի երկիրը ներդրումներ կատարի Իրանի ամենատարբեր բիզնես-նախագծերում»,-ընդգծեց նա:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում