ԵՐԵՎԱՆ, 13 նոյեմբերի. /Նովոստի-Արմենիա/. Ճապոնական ընկերության հայաստանյան ներկայացուցչության ստեղծման նպատակով «Գրանդ Հոլդինգ»-ը 1,5 միլիարդ դրամի ներդրում է կատարել:
Ինչպես հաղորդում է քաղաքապետարանի մամուլի ծառայությունը, քաղաքապետ Տարոն Մարգարյանը ներկա է գտնվել Երևանի Թբիլիսյան խճուղի 1/12 հասցեում գտնվող «ISUZU Motors» ընկերության հայաստանյան ներկայացուցչության բացման հանդիսավոր արարողությանը:
«Գրանդ Հոլդինգ»-ի սեփականատերեր Միքայել և Կարեն Վարդանյանների ուղեկցությամբ՝ քաղաքապետը շրջել և ծանոթացել է տեղում ստեղծված պայմաններին:
Նշվել է, որ ISUZU մակնիշի փոքր և միջին բեռնատար ավտոմեքենաների վաճառքից բացի, ներկայացուցչությունը կիրականացնի նաև երաշխիքային սպասարկում:
Ստեղծվել է նաև 25 աշխատատեղ:
«Շրջայցի ավարտին «Գրանդ Հոլդինգ»-ի սեփականատերերը հաճելի անակնկալ են մատուցել քաղաքապետ Տարոն Մարգարյանին՝ ընկերության կողմից Երևանի քաղաքապետարանին նվիրաբերելով ISUZU մակնիշի երկու բեռնատար ավտոմեքենա: Իր հերթին շնորհավորելով ներկայացուցչության բացման առթիվ և շնորհակալություն հայտնելով նվիրաբերված բեռնատարների համար` Տարոն Մարգարյանն էլ վստահեցրել է, որ դրանք լիարժեք կծառայեն մայրաքաղաքին», - նշվում է հաղորդագրության մեջ: -0-