Ոստիկանություն. ոստիկանության շենքի զավթման ժամանակ չորս վիրավորվածներից երկուսը ծայրահեղ ծանր վիճակում են

ԵՐԵՎԱՆ, 17 հուլիսի. /Նովոստի–Արմենիա/. Երևանի ՊՊԾ գնդի շենքի զավթման ժամանակ վիրավորում ստացած երկու ոստիկաններ գտնվում են ծայրահեղ ծանր վիճակում, լրագրողներին ասաց Հայաստանի փոխոստիկանապետ Հունան Պողոսյանը։

«Երկու վիրավորների վիճակը ծայրահեղ ծանր է, երկուսինը` ծանր, նրանք տարբեր աստիճանի վնասվածքներ են ստացել։ Վիրավորներից մեկը ոստիկանության տեսաօպերատոր է»,– նշեց նա։

Պողոսյանը միաժամանակ հայտնեց, որ վիրավորները տեղափոխվել են Երևանի քաղաքացիական հիվանդանոցներ, ինչպես նաև Զինվորական հոսպիտալ։

Խոսելով սպանված գնդապետ Արթուր Վանոյանի մասին` փոխոստիկանապետը նշեց, որ հարձակման ժամանակ նա մահացու հրազենային վիրավորում է ստացել։

Հունանյանը ցավակցություն է հայտնել Վանոյանի ընտանիքին և ընդգծել է, որ «նա մեր վաղեմի գործընկերն էր, զինակիցը, լավագույններից մեկը»։

Նա միաժամանակ չնշեց Երևանում ՊՊԾ գնդի վրա հարձակվածների թիվը։

Կիրակի լուսադեմին մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց։ Հարձակման ժամանակ մեկ ոստիկան զոհվել է, չորսը` վիրավորվել։ Որոշ տեղեկություններով` զինված անձինք «Հիմնադիր խորհրդարան» արմատական ընդդիմադիր կազմակերպության կալանավորված առաջնորդ Ժիրայր Սեֆիլյանի կողմնակիցներն են, ովքեր պահանջում են ազատել նրան։ -0-