Ռուսների ավելի քան 50 տոկոսը մտադիր է իր ձայնը տալ Պուտինին նախագահական ընտրությունների ժամանակ

Ռուսների ավելի քան 50 տոկոսը մտադիր է նախագահական առաջիկա ընտրությունների ժամանակ քվեարկել վարչապետ Վլադիմիր Պուտինի օգտին, վկայում են «Հանրային կարծիք» հիմնադրամի հարցման տվյալները:

Հարցման համաձայն՝ բնակչության 52 տոկոսը մտադիր է իր ձայնը տալ Պուտինի համար: Նրանց 26 տոկոսը նշում են, որ հաստատ կքվեարկեն նրա թեկնածության օգտին, 16 տոկոսը՝ ամենայն հավանականությամբ, 10 տոկոսը՝ հնարավոր է: Հարցվածների ևս 33 տոկոսը հայտնել են, որ դժվար թե կողմ քվեարկեն Պուտինի թեկնածությանն առաջիկա ընտրություններում, և 6 տոկոսը համոզված է, որ չի գնալու մարտյան ընտրություններին:

Պուտինի համար ձայն տվողների մեծամասնությունը Սիբիրի դաշնային օկրուգի բնակիչներ են (59 տոկոս): Վարչապետին իրենց ձայնը տվողներն առավելապես տարեց մարդիկ են (58 տոկոս) միջինից ցածր կրթությամբ, բայց միջինից բարձր եկամուտներով (57 տոկոս):

Նրանք, ովքեր հայտարարել են, թե ամենայն հավանականությամբ կքվեարկեն Պուտինի թեկնածության համար, ապրում են առավելապես Կենտրոնական դաշնային օկրուգում 40 տոկոս, ամենից հաճախ դրանք բարձր եկամուտ ունեցող մարդիկ են (43 տոկոս):

Հիմնադրամի նախագահ Ալեքսանդր Օսլոնի խոսքերով՝ վարչապետի ընտրազանգվածի վարկանիշը դեկտեմբերի 25-ի դրությամբ կազմում է 44 տոկոս, հաղորդում է «ՌԻԱ Նովոստին»:

«Եթե նայենք Պուտինի վարկանիշին 2010 թվականի վերջում, ապա այն կազմում էր 56 տոկոս... Այնուհետև նվազման միտում է նկատվում, և գրեթե մեկ տարվա ընթացքում այդ նվազումն էական դարձավ»,- ասել է Օսլոնը «ՌԻԱ Նովոստիում» կայացած մամուլի ասուլիսում:

Նա նշել է, որ վարկանիշի նվազման առանցքային պահը 2010 թվականի հունվար-փետրվարին գների բարձրացումն էր: -0-