Պուտինը Պրոխորովին արժանի և ուժեղ մրցակից է համարում ՌԴ նախագահական ընտրությունների ժամանակ

ՌԴ վարչապետ Վլադիմիր Պուտինը գործարար Միխայիլ Պրոխորովին ուժեղ և արժանի մրցակից է համարում 2012 թ.-ի մարտի 4-ին կայանալիք նախագահական ընտրությունների ժամանակ, հաղորդում է «ՌԻԱ Նովոստին»:

«Համոզված եմ, որ նա արժանի, ուժեղ մրցակից կլինի», - հայտարարել է Պուտինը՝ «Զրույց Վլադիմիր Պուտինի հետ. Շարունակություն» ծրագրի ուղիղ եթերում պատասխանելով ռուսաստանցիների հարցերին:

«Չեմ կարող ասել, որ նրան հաջողություն եմ ցանկանում, որովհետև ես էլ եմ պատրաստվում առաջադրել իմ թեկնածությունը», - ժպիտով նշել է ՌԴ վարչապետը:

Պուտինը հիշեցրել է, որ Պրոխորովը ՌԴ քաղաքացի է, «ով որոշակի տարիքային ցենզի է հասել» և իրավունք ունի մասնակցել նախագահական ընտրություններին:

ՌԴ վարչապետը նշել է, որ ավելի վաղ գործարարը փորձել էր աջակողմյան կուսակցություն ստեղծել («Արդար գործ»), սակայն նրա մոտ «խնդիրներ ծագեցին, որոնք շատերին հայտնի են»:

«Սակայն Միխայիլ Դմիտրիևիչը հետևողական մարդ է, նա իր ասածից հետ չի կանգնի: Ինձ թվում է, որ նա որոշել է նոր հարթակ օգտագործել, որպեսզի առաջ տանի այն գաղափարները, որոնք ճիշտ է համարում մեր երկրի համար: Նա գործում է օրենքի, սահմանադրության շրջանակներում: Ցանկացած մարդ ունի դրա իրավունքը», - ասել է Պուտինը:-0-