Եվրոպական և ասիական մեդիաների ֆորումը երկխոսության հեղինակավոր հարթակ է դարձել. Նազարբաև

Ղազախստանի նախագահ Նուրսուլթան Նազարբաևը ողջունել է Եվրոպական և ասիական մեդիաների վեցերորդ ֆորումի մասնակիցներին: Նա ֆորումը համարել է երկխոսության հեղինակավոր հարթակ՝ ԶԼՄ-ների զարգացման հարցերի քննարկման համար, հաղորդում է ՌԻԱ Նովոստին:

«Եվրոպական և ասիական մեդիաների ֆորումը, որն անցկացվում է վեցերորդ անգամ անընդմեջ, արդեն դարձել է երկխոսության հեղինակավոր հարթակ՝ ԶԼՄ-ների զարգացման հարցերի քննարկման համար», - նշվում է ողջույնի խոսքում, որը Նազարբաևի անունից ընթերցել է Ղազախստանի նախագահի աշխատակազմի ղեկավարի տեղակալ Բագլան Մայլիբաևը:

Նազարբաևի կարծիքով՝ նման հանդիպումները էական ներդրում են կատարում հետխորհրդային տարածքում ինտեգրացիոն գործընթացների առաջխաղացման գործում: Նա բավականին խորհրդանշական է համարել այն փաստը, որ Ղազախստանի երիտասարդ մայրաքաղաքը՝ Աստանան, ընտրվել է ֆորումի անցկացման վայր՝ «Անկախ պետությունների լրատվական գործընկերություն. քսանամյակի փորձ» նշանաբանի ներքո: Ղազախստանի նախագահը հիշեցրել է, որ դեկտեմբերի 16-ին հանրապետությունը կնշի անկախության 20-ամյակը:
«Այս բոլոր տարիների ընթացքում մեր երկիրը առաջնային դեր է խաղում ԱՊՀ ժողովուրդների մերձեցման գործում», - նշել է նախագահը:

Նա հիշեցրել է, որ Ղազախստանի նախաձեռնությամբ և ակտիվ մասնակցությամբ ստեղծվել են ԵվրԱզԷՍ-ը, ՀԱՊԿն ու Մաքսային միությունը: Եղբայրական երկրների աջակցությամբ Ղազախստանը ընտրվել է ԵԱՀԿ նախագահ, ավելացրել է նա:

 «Այս ամենը խոսում է մեր պետությունների միջև վստահության բարձր մակարդակի և համագործակցության մեծ հեռանկարների մասին», - նշել է Նազարբաևը:

Նախագահը ֆորումի մասնակիցներին մաղթել է արդյունավետ աշխատանք, թարմ գաղափարներ և նոր ստեղծագործական հաջողություններ:-0-