Մեդվեդևը կողմ է, որ նախարարներն ամիսը մեկ անգամ ելույթ ունենա հեռուստատեսությամբ

Ռուսաստանի նախագահ Դմիտրի Մեդվեդևը կողմ է հեռուստատեսությամբ ամիսը մեկ անգամ նախարարների ելույթի գաղափարին և նրանց մասնակցությանը թոք-շոուներին, հաղորդում է ՌԻԱ Նովոստին:

Նախագահի կողմնակիցների հանրային կոմիտեի ներկայացուցիչների հետ Մեդվեդևի հանդիպման մասնակիցներից մեկն առաջարկել է նախարարների համար լայն արձագանք ստացած գործերով պարտադիր օն-լայն ասուլիսներ ներդնել և ներգրավել նրանց թոք-շոուների մասնակցության:

«Նախարարները Պետդումա են գնում, դա ցանկացած թոք-շոուից լավ է: Ավելին, այնտեղ լսումներն ավելի հրապարակային են: Նրանք գալիս են, ելույթ են ունենում՝ ինչ-որ մեկը՝ հաջող, մյուսը՝ պակաս հաջողված, երրորդը՝ ձանձրալի կամ ինչ-որ կայծով»,- ասել է Մեդվեդևը:
Պետության ղեկավարը նշել է, որ որևէ վատ բան չի տեսնում, որ նախարարները թոք-շոուների մասնակցեն:
«Որևէ վատ բան չեմ տեսնում, որ նախարարները թոք-շոուների գնան, կարևորը, որ նրանք էլ «խաղի մեջ չմտնեն», որովհետև մարդն ապրում է սեփական օրենքներով, և որ նրանք մնան իրենց դիրքում: Սկզբունքորեն, եթե նրանք գնան հասարակական տարբեր ծրագրերի, դրանում վատ բան չկա»,- ավելացրել է նախագահը:

Նա միաժամանակ պարտադիր չի համարում նախարարի մասնակցությունը հանրային հաղորդումներին:
«Նրանք էլ իրենց օպերատիվ ազատությունն ունեն: Բայց ամիսը մեկ անգամ մեր նախարարների հայտնվելու և իրենց կատարած աշխատանքի մասին պատմելու գաղափարը հեռուստաալիքների եթերում կամ հաղորդակցության այլ միջոցների կիրառմամբ ինձ դուր է գալիս»,- ընդգծել է նախագահը: -0-