«Արմավիա» ավիաընկերության համար առաջին Superjet-100-ը ձևակերպվել է Խաբարովսկի երկրամասի մաքսատանը

ԵՐԵՎԱՆ, 20 ապրիլի. /Նովոստի-Արմենիա/. Խաբարովսկի երկրամասի Ամուրի մաքսատան Լենինյան մաքսակետի աշխատակիցները ձևակերպել և մաքսային սահմանով անցկացրել են Sukhoi Superjet 100 քաղաքացիական ինքնաթիռի առաջին օրինակը, որը նախատեսված է «Արմավիա» հայկական ավիաընկերության համար, չորեքշաբթի «ՌԻԱ Նովոստիին» տեղեկացրել է Ամուրի մաքսատան հասարակայնության հետ կապերի արտահաստիքային մասնագետի պաշտոնակատար Նատալյա Պանովան:

«Սուխոյի քաղաքացիական ինքնաթիռներ» ՓԲԸ (մտնում է «Սուխոյի» կազմի մեջ) կողմից՝ Boeing-ի հետ համատեղ արտադրած Sukhoi Superjet 100 քաղաքացիական ինքնաթիռը նախատեսված է մինչև 98 ուղևորի փոխադրման համար՝ մինչև 4,4 հազար կիլոմետր հեռավորության վրա։ Առաջինը Superjet 100-ը ներկայացվել է հանրությանը 2007 թվականի սեպտեմբերի 26-ին Կոմսոմոլսկ Ամուրի գործարանում։ Այնտեղ էլ 2008 թվականի մայիսի 19-ին այն հաջողությամբ կատարել է առաջին թռիչքը։ Ինքնաթիռը ստեղծվում է միջազգային համագործակցության պայմաններում, նախագծի իրականացմանը մասնակցում է ավելի քան 30 ընկերություն:

«95007-1 սերիական համարով Յուրի Գագարինի անվան ինքնաթիռը հաջող կերպով արտահանվել է այս տարվա ապրիլի 15-ին Ամուրի մաքսատան Լենինյան մաքսակետի պաշտոնյաների կողմից», - նշել է Պանովան:

Նա ասել է, որ ինքնաթիռի դետալները բերվում են աշխարհի տարբեր երկրներից, դրանք բոլորը արդեն վեց տարի է ձևակերպվում են Ամուրի մաքսատան Լենինյան մաքսակետում:

Նրա խոսքերով՝ նման ապրանքների մաքսային ձևակերպումը բարդ տեխնոլոգիական գործընթաց է, որը պահանջում է ոչ միայն մաքսային օրենսդրության գիտելիքներ, այլև ինժեներական հմտություններ ճշգրիտ և բարդ մեքենաշինության ոլորտում:-0-