ՌԴ Գերագույն դատարանը չեղյալ է համարել Խոդորկովսկու և Լեբեդևի կալանքի ժամկետի երկարացումներից մեկը

ՌԴ Գերագույն դատարանի քրեական գործերի դատական կոլեգիան ուրբաթ բավարարել է ՅՈՒԿՈՍ-ի նախկին ղեկավար Միխայիլ Խոդորկովսկու և «Մենատեպ» միջազգային ֆինանսական միավորման նախկին ղեկավար Պլատոն Լեբեդևի փաստաբանների հսկողական բողոքը. նրանք բողոքարկել էին իրենց հաճախորդների կալանքի ժամկետի երկարացումներից մեկը, հաղորդում է ՌԻԱ Նովոստիի թղթակիցը դատական նիստերի դահլիճից:

Այսպիսով, կոլեգիան չեղյալ է համարել Խամովնիկի շրջանային դատարանի՝ 2010թ.-ի օգոստոսի 16-ի դատավճիռը, Մոսկվայի քաղաքային դատարանի վճռաբեկ կոլեգիայի 2010 թ.-ի սեպտեմբերի 2-ի որոշումը և Մոսկվայի քաղաքային դատարանի նախագահության՝ 2011թ.-ի փետրվարի 18-ի որոշումը:

Պաշտպանությունը պահանջում էր չեղյալ համարել այդ որոշումները, որոնցով Խոդորկովսկու և Լեբեդևի կալանքի ժամկետը երկարացվում է 2010թ.-ի օգոստոսի 17-ից-նոյեմբերի 17-ը, պաշտպանությունը պնդում էր, որ այդ որոշումներն անօրինական են, անհիմն և հակասում են փաստացի հանգամանքներին:

Խոդորկովսկին և Լեբեդևը 2010թ.-ի դեկտեմբերի վերջին դատապարտվել էին 14 տարի ազատազրկման նավթ գողանալու և հասույթի «լվացման» համար: Երկրորդ դատավարության շրջանակներում ամբաստանյալները պատիժը կրում էին առաջին քրեական գործով, սակայն տեղափոխվել էին Մոսկվայի հետաքննչական մեկուսարաններ, ինչը փաստաբաններն անօրինական համարեցին:-0-