Մոսկվայում հունվարի 26-ին սգո օր է հայտարարված Դոմոդեդովո օդանավակայանում տեղի ունեցած ահաբեկչության զոհերի հիշատակին
Մոսկվայում և Պոդմոսկովյեում հունվարի 26-ին սգո օր է հայտարարված Դոմոդեդովո օդանավակայանում տեղի ունեցած ահաբեկչության զոհերի հիշատակին, չեղյալ է հայտարարվել զվարճալի միջոցառումների մեծ մասը:
Պայթյունը տեղի է ունեցել Մոսկվայի ժամանակով ժամը 16։32-ին Դոմոդեդովո օդանավակայանի միջազգային թռիչքների սրահում։ Ըստ նախնական տվյալների՝ ռումբի հզորությունը կազմել է մոտ 5 կգ տրոտիլային համարժեքով։ Նախնական տվյալներով՝ զոհվել է 35 մարդ:
«Ի հիշատակ հունվարի 24-ին Դոմոդեդովո օդանավակայանում տեղի ունեցած ահաբեկչական ակտի զոհերի՝ Մոսկվայի քաղաքապետ Սերգեյ Սոբյանինը որոշում է ընդունել 2011 թ.-ի հունվարի 26-ը սգո օր հայտարարել Մոսկվայում», - երեքշաբթի «ՌԻԱ Նովոստի» գործակալությանը տեղեկացրել է Մոսկվայի քաղաքապետի մամուլի քարտուղար Գյուլնարա Պենկովան:
Նմանատիպ որոշում են ընդունել նաև Պոդմոսկովյեի իշխանությունները, որտեղ հունվարի 26-ին կիջեցվեն Մոսկվայի մարզի և Մոսկվայի քաղաքի բոլոր դրոշները:
«Ցավ հայտնելով Պոդմոսկովյեի տարածքում գտնվող Դոմոդեդովո օդանավակայանում 2011 թ.-ի հունվարի 24-ին կազմակերպված ահաբեկչական ակտի հետևանքով զոհերի կապակցությամբ և ցավակցելով նրանց հարազատներին և մտերիմներին՝ Մոսկվայի մարզպետ Բորիս Գրոմովի և Մոսկվայի քաղաքապետ Սերգեյ Սոբյանինի հանձնարարությամբ հունվարի 26-ը Մոսկվայի մարզում և Մոսկվա քաղաքում սգո օր է հայտարարվել», - տեղեկացրել է Մոսկվայի մարզպետի մամուլի ծառայությունը:
Մոսկվայի մարզում հեռարձակվող հեռուստառադիոընկերություններին և մշակութային հաստատություններին առաջարկվել է Սգո օրը չեղյալ հայտարարել ավելի վաղ ծրագրված բոլոր զվարճալի հաղորդումներն ու միջոցումները, ավելացրել է մամուլի ծառայությունը:
Երեքշաբթի՝ հունվարի 25-ին, Մոսկվայում և Պոդմոսվյեում չեղյալ են հայտարարվել Տատյանայի օրվան նվիրված բոլոր տոնական միջոցառումները: Մասնավորապես՝ չեղյալ են հայտարարվել Մոսկվայի քաղաքապետարանում նախատեսված Ուսանողի օրվան նվիրված միջոցառումն ու «Միսս ուսանողություն» մրցույթը: ՄՊՀ-ի ռեկտոր Վիկտոր Սադովնիչիի հանձնարորությամբ Ուսանողի օրվան նվիրված բոլոր տոնական միջոցառումները չեղյալ են հայտարարվել նաև համալսարանում:-0-
