Վրաստանն ուժ չի կիրառի տարածքային ամբողջականության վերականգնման համար. Սահակաշվիլի

ԵՐԵՎԱՆ, 23 նոյեմբերի. /Նովոստի-Արմենիա/. Վրաստանը, ապացուցելու համար ռուս-վրացական հակամարտության խաղաղ կարգավորման մտադրությունը, հանդես է գալիս միակողմանի նախաձեռնությամբ և հայտարարում է, որ Վրաստանը երբեք ուժ չի կիրառի տարածքային ամբողջականության վերականգնման համար, հայտարարեց Վրաստանի նախագահ Միխայիլ Սահակաշվիլին՝ երեքշաբթի հանդես գալով Եվրահանձնաժողովի ամբիոնից, հաղորդում է «ՌԻԱ Նովոստին»։

«Ապացուցելու համար, որ Վրաստանը ցանկանում է խաղաղությամբ լուծել Ռուսաստանի Դաշնության հետ ունեցած հակամարտությունը, այսօր մենք հանդես ենք գալիս միակողմանի նախաձեռնությամբ և հայտարարում ենք, որ Վրաստանը ուժ չի կիրառի տարածքային ամբողջականության և սուվերենության վերականգնման համար, որ նա միայն խաղաղ միջոցներ կօգտագործի դեօկուպացիայի և միավորման իրականացման համար»,- հայտարարել է Սահակաշվիլին, ում ելույթը հեռարձակվել է «Ռուսթավի-2» հեռուստաընկերության ուղիղ եթերում։

Նրա խոսքերով՝ «եթե նույնիսկ Ռուսաստանի Դաշնությունը հրաժարվի օկուպացիոն զորքերի դուրսբերումից, եթե նրա օկուպացիոն ջոկատները կրկնապատկեն մարդու իրավունքների խախտումը, Վրաստանն իրեն միայն ինքնապաշտպանության իրավունք կվերապահի իր կողմից վերահսկող 80 տոկոս տարածքների վրա հարձակման դեպքում»։

Ռուսաստանը 2008 թվականի օգոստոսի «հնգօրյա պատերազմից» հետո ճանաչեց նախկին վրացական ինքնավարությունների՝ Աբխազիայի և Հարավային Օսեթիայի անկախությունը։ Թբիլիսին Աբխազիան և Հարավային Օսեթիան բռնազավթած տարածքներ հայտարարեց և խզեց դիվանագիտական հարաբերությունները Ռուսաստանի հետ։ -0-