Վրաստանի իշխանությունները կարողացել են «լրտեսական ցանց» բացահայտել ինքնակամ հանձնվածների տվյալների շնորհիվ. ՆԳՆ

Վրաստանի իշխանությունները կարողացել են հօգուտ Ռուսաստանի լրտեսության մեջ կասկածվող անձանց մեծ խումբ ձերբակալել՝ ավելի վաղ ինքնակամ հանձնվածների կողմից տրամադրված տեղեկատվության շնորհիվ, լրագրողներին հայտարարել է Վրաստանի ՆԳՆ-ի հակահետախուզության դեպարտամենտի փոխտնօրեն Օթար Օրջոնիկիձեն:

Ավելի վաղ նա տեղեկացրել էր լրտեսության մեջ մեղադրվող 13 մարդկանց ձերբակալման մասին, որոնցից չորսը Ռուսաստանի քաղաքացիներ են, հաղորդում է «ՌԻԱ Նովոստին»:

«Այս օպերացիան հիմնականում անցկացվեց այն պատճառով, որ 2006 թ.-ին իշխանությունների որոշմամբ՝ այն անձինք, ովքեր ինքնակամ կխոստովանեին օտարերկրյա հատուկ ծառայության հետ կապեր ունենալու փաստը, կազատվեին քրեական պատասխանատվությունից», - ասել է Օրջոնիկիձեն:

«Դրանից հետո ՆԳՆ են դիմել մեծ թվով մարդիկ: Նրանց կողմից տրամադրած տեղեկատվության վերլուծության հիման վրա էլ անցկացվել է այս օպերացիան», - ավելացրել է նա:

Ինչպես տեղեկացվում էր ավելի վաղ, հակահետախուզության դեպարտամենտի կողմից անցկացված օպերացիայի ընթացքում հայտնաբերվել են «տասնյակ մարդիկ», ովքեր համագործակցում են Ռուսաստանի հատուկ ծառայությունների հետ: Նրանցից 13-ը ձերբակալվել են:-0-