Լուժկովի նամակն այլևս չէր կարող ազդել նրան աշխատանքից ազատելու մասին ՌԴ նախագահի որոշման վրա. Կրեմլ

Այն նամակը, որը Յուրի Լուժկովը, ում երեքշաբթի ազատել են  Մոսկվայի քաղաքապետարանի պաշտոնից, ավելի վաղ ուղարկել էր ՌԴ նախագահ Դմիտրի Մեդվեդևին, արդեն չէր կարող ազդել քաղաքապետին պաշտոնից ազատելու մասին պետության ղեկավարի որոշման վրա, չորեքշաբթի լրագրողներին հայտնեց նախագահի մամուլի քարտուղար Նատալյա Տիմակովան։

ԶԼՄ-ների հաղորդագրության համաձայն՝ երկուշաբթի՝ սեպտեմբերի 27-ին,  Լուժկովը Մեդվեդևի անունով նամակ էր ուղարկել նախագահի աշխատակազմ։ Դրանում, մասնավորապես, Լուժկովը գրել է իր դեմ ծավալված «վարկաբեկիչ աննախադեպ արշավները»։

«Յուրի Լուժկովին պաշտոնազրկելու մասին հրամանի ստորագրման պահին պետության ղեկավարը ծանոթ չի եղել նամակի տեքստին։ Ամեն դեպքում, դրա բովանդակությունն արդեն ոչ մի կերպ չէր կարող ազդել նախագահի որոշման վրա»,- լրագրողներին ասաց Տիմակովան՝ նրանց խնդրանքով մեկնաբանելով մոսկովյան քաղաքապետի ուղարկած նամակը։

Նա լրագրողների հարցին պատասխանելով նշեց, որ Մեդվեդևն ավելի ուշ ծանոթացել է այդ նամակի բովանդակությանը։

Երեքշաբթի Կրեմլի մամուլի ծառայությունը տեղեկացրել էր, որ Մեդվեդևը «Մոսկվայի քաղաքապետի լիազորությունների վաղաժամ դադարեցման մասին» հրաման է ստորագրել՝ Լուժկովին «զրկելով» պաշտոնից, ով ավելի քան 18 տարի զբաղեցրել է մայրաքաղաքի քաղաքապետի պաշտոնը։ Մոսկվայի քաղաքապետի պարտականությունները ժամանակավորապես ստանձնել է առաջին փոխքաղաքապետ, մայրաքաղաքի շինարարական համալիրի ղեկավար Վլադիմիր Ռեսինը։ -0-