Սպիտակ ընձառյուծը «Սոչի 2014»-ի թալիսմանների մրցույթի առաջատարն է

Սպիտակ ընձառյուծն առաջատարի դիրքում է «Սոչի-2014»-ի կազմկոմիտեի կողմից հայտարարված՝ Օլիմպիադայի լավագույն թալիսմանի մրցույթում, Սոչիում կայացած միջգերատեսչական հանձնաժողովի նիստի ժամանակ տեղեկացրել է կազմկոմիտեի նախագահ Դմիտրի Չեռնիշենկոն, հաղորդում է «ՌԻԱ Նովոստին»:

Սոչիի Օլիմպիադայի թալիսմանի գաղափարների հավաքագրման համառուսական ակցիան մեկնարկել է Գիտելիքի օրը՝ սեպտեմբերի 1-ին: Մրցույթի կազմակերպիչների մտահաղացմամբ՝ թալիսմանը պետք է «իր մեջ ընդգրկի Ռուսաստանի համար բնորոշ գծեր և, միաժամանակ, ինտուիտիվ կերպով հասկանալի լինի տամենատարբեր տարիքի, մասնագիտության և ազգության մարդկանց մեծամասնության համար»: Գաղափարների հավաքագրման փուլից հետո իր աշխատանքը կսկսի հատուկ ժյուրին, իսկ լավագույն տարբերակները կմշակվեն պրոֆեսիոնալ նկարիչների կողմից:

2011 թ.-ի փետրվարի 7-ին՝ Օլիմպիադայի մեկնարկից ուղիղ երեք տարի առաջ, տեղի կունենա 2014 թ.-ի օլիմպիական խաղերի թալիսմանի ընտրության օն-լայն քվեարկությունը: Մրցույթի միայն առաջին շաբաթվա ընթացքում «Սոչի-2014»-ի կազմկոմիտեն թալիսմանի ավելի քան հազար գաղափար է ստացել:

Ինչպես տեղեկացրել է Չեռնիշենկոն, այժմ մրցույթին ներկայացվել է ավելի քան երեք հազար աշխատանք Ռուսաստանի տարբեր մարզերից: Կազմկոմիտեի ղեկավարը նշել է, որ թալիսմանի ընտրությանը մասնակցել են նաև մի քանի խոշոր ընկերություններ: Նրա խոսքերով՝ լիցքավորման կետերում քվեարկության թերթիկներ է բաժանում «Ռոսնեֆտ» ընկերությունը:-0-