Ռուսաստանի հայկական սփյուռքին նվիրված միջազգային խորհրդաժողով՝ Սոչիում

Սոչիում օգոստոսի 28-ին «Ռուսաստանի հայկական սփյուռքը. ժամանակի մարտահրավերները» թեմայով միջազգային հասարակական խորհրդաժողով կմեկնարկի, հաղորդում է Ռուսաստանի հայերի «Երկրամաս» թերթի տեղեկատվական կենտրոնը:

Խորհրդաժողովին կմասնակցեն գիտնականներ և հասարակական գործիչներ՝ Մոսկվայից, Ռոստովի շրջանից, Ստավրոպոլի, Կրասնոդարի երկրամասերից, Ադիգեայից, Աբխազիայից, ինչպես նաև Հայաստանից և Լեռնային Ղարաբաղի Հանրապետությունից:

Խորհրդաժողովի ձևաչափը նախատեսում է չորս թեմատիկ զեկույցներ՝ «Սփյուռքն ու Հայաստանը», «Սփյուռքը և Արցախը», «Սփյուռքը և Հայ Դատը», «Սփյուռքը և հասարակությունը»: Այս թեմաների շրջանակներում կներկայացվեն հետևյալ զեկույցները՝ «Ռուսաստանի հայկական սփյուռքի դերն ու խնդիրները Հայաստանի և Ռուսաստանի համագործակցության ամրապնդման գործում», «Ռուսաստանի հայկական սփյուռքի դերն ու խնդիրները համազգային խնդիրների լուծման գործում», «Ռուսաստանի հայկական սփյուռքի դերն ու խնդիրները ԼՂՀ-ի կայացման գործում», «Ռուսաստանի հայկական սփյուռքի դերն ու խնդիրները ռուսական ոչ կառավարական կազմակերպությունների գործունեությունում», «Ռուսաստանի հայկական սփյուռքի ինքնակազմակերպման ձևերը Մոսկվայի հայկական կազմակերպությունների օրինակով», «Ռուսաստանի ջավախահայ սփյուռքի դերը ջավախահայերին մարդասիրական աջակցության և նրանց շահերի պաշտպանության, կապերի հաստատման գործում», «Հայոց լեզուն այսօր և վաղը», «Ռուսաստանի հայկական սփյուռքի հնաբնակ խմբերում ոչ նյութական ժառանգության պահպանման խնդրի մասին», «Համշենահայերը XXI դարում. խնդիրներն ու դրանց լուծման ուղիները», «Ռուսաստանի հայկական սփյուռքի աջակցության ներուժը Հայաստանի և ԼՂՀ-ի տեղեկատվական անվտանգության ապահովման գործում» և այլն:

Միջոցառման շրջանակներում ներկայացված զեկույցները կհրապարակվեն առանձին գրքույկով և «Երկրամաս» թերթի ինտերնետային կայքում:

Երկօրյա խորհրդաժողովի կազմակերպիչներն են Ռուսաստանի հայերի «Երկրամաս» թերթը և «ТВ3В» հեռուստաընկերությունը (Ռուսաստանի հարավում ТВ АРМ РУ հեռուստաալիքի թղթակցային կետը):-0-