Հայկական մշակույթի «Սև ծովը պարում և երգում է» ավանդական փառատոնը, որը նվիրված է Հայրենական Մեծ պատերազմում տարած հաղթանակի 65-ամյակին և Կրասնոդարի երկրամասի Տուապսեի շրջանի 90-ամյակին, տեղի կունենա հուլիսի 30-31-ը Կուբանում։
Ինչպես հաղորդում է Ռուսաստանի հայերի «Երկրամաս» թերթի տեղեկատվական կենտրոնը, միջոցառումները կսկսվեն հուլիսի 30-ին Տուապսե քաղաքի Մշակույթի տանը։ Այդ օրը ծրագրված է, մասնավորապես, «Հյուսիսային Կովկասի հայերը» գիտաժողովի և գրքերի, գեղանկարչության, կիրառական արվեստի, սպասքի, ազգային խոհանոցի ցուցահանդեսների անցկացում։
Հաջորդ օրը տեղի կունենա Ազգային խոհանոցի տոնը և Տուապսե քաղաքի ու Տուպսեի շրջանի ազգագրական և էստրադային կոլեկտիվների ելույթը։ Փառատոնը կփակվի հրապարակում տոնական հրավառությամբ։
Հայկական մշակույթի փառատոնը կազմակերպվել է Տուապսեի շրջանի «Համշեն» հայկական բարեգործական կրթամշակութային միության կողմից։ -0-
