Ղարաբաղի երեխաների աջակցության բարեգործական ակցիա է անցկացվել Նիժնի Նովգորոդում
Նիժնի Նովգորոդում ավարտվել է «Եղբորից եղբորը» բարեգործական հումանիտար ակցիան, որի շրջանակներում Արցախի երեխաների համար կազմակերպվել էր մանկական իրերի հավաքագրում:
Ինչպես հաղորդում է Ռուսաստանի հայերի «Երկրամաս» թերթի տեղեկատվական կենտրոնը, միջոցառումն անցկացվել է Հայ Առաքելական Եկեղեցու Արցախի թեմի առաջնորդ Պարգև արքեպիսկոպոս Մարտիրոսյանի օրհնությամբ: Ակցիայի կազմակերպիչն է «Կամուրջ» տեղեկատվական-վերլուծական ալմանախը:
«Եղբորից եղբորը» ակցիան անցկացվել է «Մոնթե Մելքոնյան» հասարակական բարեգործական կազմակերպության հետ համատեղ: Այս հիմնադրամի ներկայացուցիչները «Զվարթնոց» օդանավակայանում ստացել են մանկական իրերը, ինչից հետո տեղափոխել են դրանք Քաշաթաղի շրջան և բաժանել Բերձոր, Կարեգա, Սուս, Վակունիս, Վակազին, Գանձա, Գողթանիկ, Թիթեռնավանք, Մոշաթաղ գյուղերում:
«Կամուրջ» ալմանախի հետ համատեղ ակցիայի անցկացմանն ակտիվորեն մասնակցել են Նիժեգորոդսկու շրջանի հայկական համայնքը, «Նաիրի» ազգային պարի համույթը, հայկական կիրակնօրյա դպրոցը, «Մայրության և մանկության աջակցության հիմնադրամը», Նիժնի Նովգորոդի Լոբաչևսկու անվան պետական համալսարանի միջազգային հարաբերությունների ֆակուլտետի ուսանողները:
«Կամուրջ» ալմանախի գլխավոր խմբագիր Լիանա Զախարյանի խոսքերով` միջոցառումը հետապնդել է մի քանի նպատակ: Բացի Արցախում բնակվող ընտանիքներին օգնություն ցուցաբերելուց, ակցիան նպատակ ուներ համախմբել ազգը, ամրապնդել եղբայրական փոխօգնության հիմքը և սփյուռքահայերի մոտ պահպանել սեփական ժողովրդին պատկանելու զգացումը:
Տեղեկատվության համաձայն` իրերի տեղափոխումը Արցախ անվճար իրականացրել է «Արմավիա» ավիաընկերությունը:-0-
