ԵԱՀԿ ոստիկանության ուժերի առաքելությունը ժամանել է Ղրղզստան
Ղրղզստանի մայրաքաղաք է ժամանել Եվրոպայի անվտանգության և համագործակցության կազմակերպության (ԵԱՀԿ) ոստիկանության ուժերի գնահատող առաքելությունը, ուրբաթ «ՌԻԱ Նովոստիին» հաղորդեց հանրապետության ԱԳՆ մամուլի ծառայությունը։
«ԵԱՀԿ օպերատիվ ոստիկանության խումբը երեք հիմնական խնդիր կկատարի՝ դիտարկում, ղեկավարում և խորհրդատվություն՝ ԵԱՀԿ Քարտուղարության ընդունած գործողությունների փաթեթի շրջանակներում երկրի հարավում հետհակամարտային կարգավորման և խաղաղ գործընթացի վերականգնման հարցում Ղրղզստանին փորձագիտական օգնության ցուցաբերման շրջանակներում»,- հայտնեց գործակալության զրուցակիցը։
Ոստիկանության առաքելությունն աջակցություն կցուցաբերի ընդհանուր կարգուկանոնի վերականգնմանը, միջէթնիկական լարվածության նվազեցմանը, հումանիտար ճգնաժամի թեթևացմանը, քաղաքական երկխոսությանը նպաստող պայմաններ ստեղծելուն, նշում են Ղրղզստանի ԱԳՆ-ում։
Ղրղզստանի արտաքին քաղաքական գերատեսչությունը նշում է, որ երկրի «տվյալ միջոցառումները ձեռնարկվում են այլ միջազգային կազմակերպությունների ջանքերի հետ զուգահեռ, մասնավորապես՝ ՀԱՊԿ-ի»։ -0-
