«Լեռնային Ղարաբաղի Հանրապետության Մարտակերտի շրջանում հունիսի 19-ի գիշերը Ադրբեջանի կողմից դիվերսիոն հարձակման մասին» հայտարարությունը լսվել է ՀԱՊԿ-ին առընթեր Մշտական խորհրդի նիստի ժամանակ, որը տեղի է ունեցել հինգշաբթի կազմակերպության քարտուղարությունում, հաղորդում է Հայաստանում ՀԱՊԿ տեղեկատվական աջակցության միջազգային հանրային կենտրոնի ազգային ներկայացուցչությունը։
Հունիսի 18-ին Չայլու գյուղի մերձակայքում Ադրբեջանից ԼՂՀ տարածք է ներխուժել զինված հետախուզական խմբավորում: Սահմանն անցած ադրբեջանցիներին հաջողվել է թափանցել ղարաբաղա-ադրբեջանական զորքերի շփման գոտու հյուսիսարևելյան հատված: Տեղի է ունեցել դիմահար մերձամարտ: Թողնելով մեկ դիակ և զինամթերք` թշնամին հետ է քաշվել: Մարտի արդյունքում հայկական կողմը տվել է չորս զոհ, չորս վիրավոր:
Հայտարարությունը կարդացել է ՀԱՊԿ-ում ՀՀ լիազոր ներկայացուցիչ Ռուբեն Անանյանը։ Նաև քննարկվել են այն փաստաթղթերը, որոնք վերաբերում են համաձայնագրերի նախագծերի համաձայնեցմանը, որոնք կանոնակարգում են կոլեկտիվ անվտանգության համակարգի ուժերի գործունեությունն ու միջոցները։
Նիստին մասնակցել են ՀԱՊԿ գլխավոր քարտուղար Նիկոլայ Բորդյուժան, նրա տեղակալները, ՀԱՊԿ անդամ պետությունների մշտական ներկայացուցիչները։
ՀԱՊԿ կազմում են Հայաստանը, Բելառուսը, Ղազախստանը, Զրզստանը, Ռուսաստանը, Տաջիկստանը և Ուզբեկստանը։ -0-
