Ադրբեջանը դժգոհ է ՄԽ շրջանակներում ԱՄՆ-ի գործունեությունից
Ադրբեջանը դժգոհ է ԵԱՀԿ ՄԽ շրջանակներում ԱՄՆ-ի գործունեությունից, հինգշաբթի լրագրողների հետ զրույցի ընթացքում հայտարարել է Ադրբեջանի աշխատակազմի հասարակական-քաղաքական բաժնի ղեկավար Ալի Հասանովը, հաղորդում է «Նովոստի-Ադրբեջան» գործակալությունը:
«Մենք այդ մասին բացեիբաց հայտարարում ենք և կարծում, որ, առաջին հերթին, դա կախված է ղարաբաղյան հակամարտության վերաբերյալ ԱՄՆ-ի անտարբեր դիրքորոշումից: Ադրբեջանը շատ անգամ է տարբեր մակարդակներում բարձրացրել բռնազավթված հողերի ազատագրման հարցը: Սակայն ԱՄՆ-ի որոշ շրջանակներ, հայկական լոբբի ազդեցության տակ, այս հարցում կորցնում են իրենց չեզոքությունն ու բացեիբաց սատարում Հայաստանին»,- ասել է Հասանովը:
Նա նշել է նաև, որ ներկայում ԱՄՆ դիրքորոշումն ուղղված է նրան, որ Հայաստանին ազատի տնտեսական ծանր վիճակից:
Հաշվի չառնելով տարածաշրջանում Հայաստանի օկուպացիոն քաղաքականությունը, ճնշում չգործադրելով Հայաստանի վրա՝ նման քաղաքականությանը վերջ տալու նպատակով, ԱՄՆ-ն իր բոլոր ջանքերն ուղղում է տնտեսական ճգնաժամից դուրս բերելուն»,- ասել է Հասանովը:
Այդ պատճառով Հայաստանի հարևան երկրների, օրինակ, Թուրքիայի վրա ճնշում գործադրելով, ԱՄՆ-ն պահանջում է օգնել Հայաստանին և հարթել սոցիալ-տնտեսական և քաղաքական հարաբերությունները, կարծում է Հասանովը:
«Մենք համարում ենք, որ դա չի համապատասխանում ԱՄՆ առաքելությանը, հատկապես ԵԱՀԿ ՄԽ շրջանակներում: Եթե ԱՄՆ-ն իսկապես ցանկանում է, որ տարածաշրջանում խաղաղություն լինի, ղարաբաղյան հակամարտությունը լուծվի և բարելավվի Հայաստանի տնտեսական վիճակն ու նա միանա անդրազգային նախագծերին, ապա ԱՄՆ-ն պետք է ստիպի Հայաստանին դադարեցնել օկուպացիոն քաղաքականությունը»,- ասել է Հասանովը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
