Մեդվեդևը սիրում է ֆրանսիական կինոն և ափսոսում է, որ ժամանակին ֆրանսերեն չի սովորել
ԵՐԵՎԱՆ, 25 փետրվարի. /Նովոստի-Արմենիա/. ՌԴ նախագահ Դմիտրի Մեդվեդևը, չնայած ազատ ժամանակի բացակայությանը, իրեն երջանիկ մարդ է համարում, սիրում է ֆրանսիական կինոն ավելի շատ, քան հոլիվուդյանը և զղջում է, որ չի սովորել ֆրանսերեն կամ գերմաներեն, հաղորդում է «ՌԻԱ Նովոստին»:
Մարտի սկզբին լրանում է երկրորդ տարին, ինչ Մեդվեդևն ընտրվել է ՌԴ երրորդ նախագահի պաշտոնում: «Հասկանում եք, ցանկացած մարդու համար, ինձ թվում է, մեծ երջանկություն է աշխատել սեփական երկրի համար, որին սիրում ես, փորձում ես օգուտ բերել, հատկապես նման բարձր դիրքից: Այս իմաստով ես, իհարկե, երջանիկ մարդ եմ: Իսկ որ ժամանակը քիչ է, ինչ արած...», - ասել է Մեդվեդևը մարտի 1-2-ին Փարիզ այցելության նախաշեմին «Պարի Մաչ» ֆրանսիական ամսագրին տված հարցազրույցում:
«Սակայն ես երբեմն ցանկանում են ինչ-որ կերպ ցրվել, այդ պատճառով ունեմ մի խումբ զվարճություններ, որոնք ինձ այսօր հետաքրքրում են: Դա և լուսանկարչությունն է, և երաժշտությունը», - տեղեկացրել է նախագահը:
ՌԴ նախագահի խոսքերով, ինքը երաժշտություն է սիրում և ազատ ժամանակ բավականին շատ է լսում:
«Անխոս, ինչպես ցանկացած նորմալ մարդ ես գրքեր եմ կարդում, երբեմն ֆիլմեր եմ դիտում, ի դեպ ֆրանսիական ֆիլմեր: Ինձ դուր է գալիս ֆրանսիական կինեմատոգրաֆիան, քանի որ այն ավելի մոտ է մերին: Ես դեմ չեմ Հոլիվուդին, հոլիվուդյանն էլ լավն է, սակայն, ամեն դեպքում, ֆրանսիական կինոն ավելի մոտ է ռուսական ընկալման, ռուսական զգայուն հոգու համար», - կարծում է Մեդվեդևը:
«Ես ցանկանում եմ նշել, որ հիանում եմ ֆրանսիական կինեմատոգրաֆիայի զարգացմամբ: Կարծում եմ, որ մենք պետք է պարտադիր օգտվեք այդ փորձից ռուսական կինոյի համար: Ցավոք, չեմ կարողանում դիտել ֆրանսիական ֆիլմերը ֆրանսերենով: Ես միշտ ափսոսել եմ, որ սովորել եմ անգլերեն, այլ ոչ թե ֆրանսերեն կամ գերմաներեն», - խոստովանել է նա:
Նախագահը նշել է, որ իր իրավաբանական կարիերայի ժամանակ շատ գրքեր է կարդացել Ֆրանսիայի և Գերմանիայի օրենսդրության մասին:
«Այն մեզ ավելի մոտ է, հատկապես քաղաքացիական օրենսդրությունը, քան անգլիականը: Եվ Նապոլեոնի կանոնագիրքը հասկանալի պատճառներով ավելի լավ է բնօրինակով կարդալ» , - ասել է Մեդվեդևը:-0-
