ԵՐԵՎԱՆ, 2 փետրվարի. /Նովոստի-Արմենիա/. ԱՊՀ սահմանապահ զորքի մասնակցությամբ Հաղթանակի վազքամրցումը երեքշաբթի մեկնարկել է Գրոդնո և Մուրմանսկ քաղաքներում, մայիսին վազքամրցման երկու խորհրդանիշերը «կհանդիպեն» Մոսկվայում, ասվում է երեքշաբթի ՌԴ ԱԴԾ հասարակայնության հետ կապերի կենտրոնի տարածած հաղորդագրության մեջ:
Վազքամրցման միասնական խորհրդանիշը կփոխանցվի ԱՊՀ պետությունների սահմանների երկայնքով երկու երթուղով, հաղորդում է «ՌԻԱ Նովոստին»:
«Հաղթանակի վազքամրցման նպատակը ԱՊՀ անդամ-պետությունների ժողովուրդների միջև միասնականության ու բարեկամության ամրապնդումն է, Հայրենական մեծ պատերազմի տարիներին սահմանապահների հերոսական սխրանքների հիշատակի հավերժացումը և սահմանապահ մարմինների աշխատակիցների ու սահմանամերձ շրջանների բնակիչների հայրենասիրական դաստիարակությունը»,- ասվում է գերատեսչության հաղորդագրության մեջ:
Վազքամրցման առաջին խումբը երթուղի է դուրս եկել Մուրմանսկից: Վազքամրցման խորհրդանիշը կշրջանցի ՌԴ սահմանը մինչև Ռատմանովի կղզի, հետո Ալթայի երկրամասից սահմանապահներն այն կփոխանցեն Ղազախստանի, Ղրղզստանի, Տաջիկստանի, Ուզբեկստանի, Թուրքմենստանի և Ադրբեջանի իրենց գործընկերներին:
Երկրորդ թիմը դուրս է եկել բելառուսական Գրոդնո քաղաքից: Նրանք միասնական խորհրդանիշը պետք փոխանցեն Ուկրաինայի սահմանապահներին, որտեղից այն կմեկնի Մոլդովա, հետո Ռուսաստանի սևծովյան ափերը և Հյուսիսային Կովկաս ու Հայաստան:
Երկու խորհրդանիշերը «կհանդիպեն» Մոսկվայում՝ Պոկլոնի լեռան վրա մայիսի վերջին: Դրանցից մեկը պահպանության կհանձնվի Հայրենական մեծ պատերազմի թանգարան, իսկ մյուսը՝ ՌԴ ԱԴԾ Կենտրոնական սահմանապահ թանգարան: -0-
