Նիկիտա Սիմոնյանը ժամանակավորապես կգլխավորի Ռուսաստանի ֆուտբոլի միությունը. աղբյուր

Լեգենդար ֆուտբոլիստ, ԽՍՀՄ բազմակի չեմպիոն, ՌԽՍՀ և ԽՍՀՄ վաստակավոր մարզիչ Նիկիտա Սիմոնյանը նոյեմբերի 24-ից ժամանակավորապես կգլխավորի Ռուսաստանի ֆուտբոլի միությունը, հաղորդում է «Սովետսկի սպորտը»:

Ինչպես հայտնել է ՌՖՄ նախագահ Վիտալի Մուտկոն, հաջորդ շաբաթ ինքը պետք է հեռանա իր պաշտոնից:

ՌՖՄ կանոնադրության համաձայն՝ նախագահի պաշտոնաթող լինելուց հետո նրա գործառույթները կատարում է առաջին տեղակալը՝ մինչև նոր ընտրությունները:

Ինքը՝ Նիկիտա Սիմոնյանը, «Սովետսկի սպորտին» Մուտկոյի հեռանալը մեկնաբանել է հետևյալ կերպ. «Ես դեմ եմ Մուտկոյի հեռանալուն, դա հապճեպ եմ համարում: Ես սահուն անցման կողմնակից եմ և կցանկանայի, որպեսզի Մուտկոն աշխատեր մինչև հաջորդ համաժողով»:

Սիմոնյանի խոսքերով՝ Մուտկոն բարձր պաշտոն է զբաղեցնում, այդ պատճառով այնքան էլ հաճախ չէր լինում ՌՖՄ-ում: «Եվ ամենքը լավ էին աշխատում: Աշխատակիցներն իրենց տեղում են և գիտեն իրենց գործը»,- ավելացրեց նա:--0--