ԵՐԵՎԱՆ, 20 հոկտեմբերի. /Նովոստի-Արմենիա/. ԱՊՀ երկրների ներկայացուցիչներն առաջին անգամ մասնակցում են երկուշաբթի Պոդմոսկովյեում բացված Ռուսաստանի երիտասարդ գրողների 9-րդ ֆորումին, «Նովոստի-Արմենիա» գործակալությանը հայտնեց ԱՊՀ անդամ-պետությունների հումանիտար համագործակցության միջպետական հիմնադրամի մամուլի քարտուղար Ալեքսանդր Կալուգինը:
«Ֆորումի շրջանակներում ԱՊՀ անդամ-պետությունների հումանիտար համագործակցության միջպետական հիմնադրամի աջակցությամբ տեղի ունեցավ կլոր սեղան ԱՊՀ երկրների՝ Ադրբեջանի, Հայաստանի, Բելառուսի, Վրաստանի, Ղազախստանի, Ղրղզստանի, Մոլդովայի և Ուկրաինայի երիտասարդ գրողների մասնակցությամբ»,- ասաց Կալուգինը:
Ֆորումի մասնակիցներին ուղղված իր ողջույնի խոսքում ՌԴ նախագահ Դմիտրի Մեդվեդևը նշեց ֆորումի կարևորությունը և դրան ԱՊՀ երկրներից ժամանած գրողների մասնակցությունը:
Ֆորումի շրջանակներում կանցկացվեն վարպետության դասընթացներ հայտնի գրողների ղեկավարությամբ, կլոր սեղաններ և քննարկումներ, կկայանան հանդիպումներ գրական ամսագրերի խմբագիրների, գրողների, գիտնականների, հասարակական գործիչների, տնտեսագետների հետ:
Ֆորումին կմասնակցեն հայտնի արվեստի գործիչներ և գրականագետներ, մասնավորապես, Ալեքսանդր Գորոդնիցկին, Վլադիմիր Մականինը, Օլեսյա Նիկոլաևան, Յուրի Սիմոնով-Վյազեմսկին, Ալեքսանդր Տիմոֆեևսկին, Մարիետտա Չուդակովան, Կարեն Շահնազարովը: -0-
