ՌԴ նախագահ Դմիտրի Մեդվեդևը ժամանել է Մոսկվայի կենտրոնական ձիարշավարան։ Պետության նախագահը հետևելու է ՌԴ նախագահի մրցանակի ձիարշավին, հաղորդում է «ՌԻԱ Նովոստին»։
Մեդվեդևի հետ միասին ձիարշավին հետևելու են եկել Համագործակցության մի շարք երկրների առաջնորդները։ Մասնավորապես՝ ձիարշավարանում ներկա են Ղազախստանի նախագահ Նուրսուլթան Նազարբաևը, ՀՀ նախագահ Սերժ Սարգսյանը, Ադրբեջանի նախագահ Իլհամ Ալիևը, Մոլդովայի նախագահ Վլադիմիր Վորոնինը, Տաջիկստանի նախագահ Էմոմալի Ռահմոնը, ինչպես նաև Աբխազիայի և Հարավային Օսեթիայի առաջնորդներ Սերգեյ Բագապշն ու Էդուարդ Կոկոյտին։
Այսօրվա մրցումներում նախատեսված է ութ ձիարշավ և երկու մրցարշավ։ ՌԴ նախագահի մրցանակի հետ միասին խաղարկվում են «Մեծ ինտերնացիոնալ մրցանակը», «Ձիաբուծության ազգային միության մրցանակը», «ՌԴ գյուղատնտեսության նախարարության մրցանակը», «Մոսկվայի կենտրոնական ձիարշավարանի 175-ամյակի մրցանակը» և մի շարք այլ մրցանակներ։
Ինչպես ակնկալվում է, մրցումները դիտելիս նախագահները կկարողանան ոչ պաշտոնական մթնոլորտում քննարկել հրատապ խնդիրներ։
Այս մրցումները նախորդ տարվա մրցումներից թերևս տարբերվեն նրանով, որ ոչ առաջնորդները, ոչ հանդիսատեսը չեն կարող իրենց բախտը փորձել՝ խաղադրույք կատարելով ձիարշավի հաղթողի վրա։ Պատճառն այն է, որ դա արգելված է օրենքով։ Օրենքը, որը թույլ է տալիս պետական ձիարշավարաններում խաղադրույք կատարել, չորեքշաբթի ընդունվել է ՌԴ Պետդումայի կողմից և այսօր ներկայացվել է Դաշնության խորհրդի հավանությանը, սակայն եթե այն նույնիսկ հավանության արժանանա, ապա ուժի մեջ կմտնի ավելի ուշ, քանի որ Գերագույն պալատի կողմից հավանության արժանանալուց հետո, այն պետք է ստորագրվի նախագահի կողմից, այնուհետև հրապարակվի։-0-
