Մոսկվան դրական է գնահատում Երևանում, Բաքվում և Ստեփանակարտում անցկացված Ադրբեջանի և Հայաստանի ներկայացուցիչների հանդիպումների արդյունքները
Մոսկվան դրական է գնահատում Երևանում, Բաքվում և Ստեփանակերտում անցկացված Ադրբեջանի և Հայաստանի հասարակական, քաղաքական և մշակութային գործիչների հանդիպումների արդյունքները, ասվում է ՌԴ ԱԳՆ պաշտոնական կայքում տեղակայված ՌԴ ԱԳՆ տեղեկատվության մեջ:
«Ռուսական կողմը դրական է գնահատում տեղի ունեցած հանդիպումների արդյունքները: Այսուհետ ևս ակտիվորեն կնպաստենք ղարաբաղյան հակամարտության կարգավորման գործընթացի առաջխաղացմանն՝ այդ թվում նաև ակտիվորեն աջակցելով ժողովրդական դիվանագիտության ուղղությամբ ձեռնարկվող քայլներին», - ընդգծվում է տեղեկատվության մեջ:
Հուլիսի 3-ին Երևանում, Բաքվում և Ստեփանակերտում տեղի ունեցան ադրբեջանցի և հայ հասարակական և մշակութային գործիչների, Ազգային ժողովների պատգամավորների, ԶԼՄ-ների ներկայացուցիչների հանդիպումները, որոնք անցկացվեցին Մոսկվայում երկու երկրների դեսպաններ Արմեն Սմբատյանի և Փոլադ Բյուլբյուլօղլու, ինչպես նաև ՌԴ նախագահի միջազգային-մշակութային համագործակցության հարցերով հատուկ ներկայացուցիչ, հատուկ հանձնարարություններով դեսպան Միխայիլ Շվիդկոյի մասնակցությամբ:
«Ինչպես հայտնի է՝ առաջին նման միջոցառումը տեղի էր ունեցել 2007 թ.-ի հունիսին: Այս հանդիպումները դարձան կարևոր նախաձեռնության շարունակությունը: Կարծիքների շահագրգիռ փոխանակումը հաստատեց, որ հանրությունը, քաղաքացիական հասարակության ինստիտուտները կոչված են զգալի ներդրում կատարել ղարաբաղյան հակամարտության մեջ ներգրավված կողմերի միջև վստահության վերականգնման ու ամրապնդման, ինչպես նաև հակամարտության խաղաղ լուծման համար բարենպաստ մթնոլորտի ձևավորման գործում», - ընդգծել են ՌԴ ԱԳՆ-ից:
Տեղեկատվության մեջ կարևորվում է նաև այն հանգամանքը, որ երկխոսության մասնակիցներին ընդունած Հայաստանի և Ադրբեջանի նախագահներ Սերժ Սարգսյանն ու Իլհամ Ալիևն աջակցել են նրանց ջանքերին:-0-
