Ռուսաստանը և Հայաստանը կստեղծեն հակաօդային պաշտպանության (ՀՕՊ) միասնական համակարգ, որը Բելառուսի հետ արդեն գոյություն ունեցող համակարգի նմանակը կլինի, ուրբաթ Մոսկվայում մամուլի ասուլիսի ժամանակ հայտարարել է Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Նիկոլայ Բորդյուժան։
«Այն, ինչ ստեղծվել է Ռուսաստանի և Բելառուսի միջև՝ այսպես կոչված ՀՕՊ-ի միասնական համակարգը, ՀԱՊԿ-ի շրջանակներում անցկացվող աշխատանքի միայն մի մասն է։ Մենք ենթադրում ենք, որ նմանատիպ համատեղ երկկողմ համակարգ կստեղծվի նաև Ռուսաստանի և Հայաստանի միջև», - ասել է Բորդյուժան, հաղորդում է «ՌԻԱ Նովոստին»։
Նա նշել է, որ այժմ համաձայնեցվում են Կենտրոնասիական տարածաշրջանում ՀՕՊ միասնական համակարգի ստեղծման մասին նորմատիվային փաստաթղթերը։
«Եվ այժմ այդ փաստաթուղթը քննարկման փուլում է», - նշել է Բորդյուժան։ Նրա խոսքերով, երեք՝ Արևելաեվրոպական, Կովկասյան և Կենտրոնասիական տարածաշրջաններում ՀՕՊ միասնական համակարգի ստեղծումը միայն առաջին փուլն է։
«Դրանից հետո մենք կբարձրանանք ավելի բարձր աստիճանի վրա, երբ կսկսենք համակարգել տարածաշրջանային բոլոր համակարգերի գործունեությունը, մշակել ռազմական հերթապահության իրականացման միասնական կանոններ, ինչպես նաև մշակել տեղեկատվության փոխանակման համակարգ», - պարզաբանել է ՀԱՊԿ գլխավոր քարտուղարը։
Բորդյուժան նշել է, որ վերջին ժամանակներում ՀԱՊԿ պետությունների միջև ռազմատեխնիկական համագործակցության հարցը դառնում է հիմնականը կազմակերպության գործունեության մեջ։
«ՀԱՊԿ անդամ-պետությունները շահագրգռված են զենքի ժամանակակից տեսակներով, և այժմ ընթանում է սպառազինությունների գնման աստիճանական աճ։ Մինչ վերջերս մենք մեծ շահագրգռվածություն և պայմանագրերի թվի աճ էինք նկատում ՀԱՊԿ բոլոր պետությունների կողմից սպառազինությունների գնման գործում», - նշել է Բորդյուժան։
Նա պարզաբանել է, որ այսօրվա դրությամբ ՀԱՊԿ պետություններին հետաքրքրում են սպառազինությունների տարբեր տեսակներ՝ և ավիացիոն տեխնիկա, և ՀՕՊ համակարգեր, զրահատեխնիկա և հրաձգային զենք, կապի ժամանակակից միջոցներ։ «Շատ մեծ ուշադրության են արժանանում պահեստային մասերը», - ավելացրել է Բորդյուժան։ ՀԱՊԿ կազմում են Ռուսաստանը, Հայաստանը, Բելառուսը, Ղազախստանը, Ղրղզստանը, Տաջիկստանն ու Ուզբեկստանը։-0-
