Պետդուման վավերացրել է ՀԱՊԿ երկրներին ռազմատեխնիկական օգնության մասին արձանագրությունը
Պետդուման ուրբաթ վավերացրել է ագրեսիայի ծագման սպառնալիքի կամ գործողության, այդ թվում ահաբեկչական գործողությունների իրագործման դեպքերում ՀԱՊԿ անդամ-պետություններին ռազմատեխնիկական օգնություն ցուցաբերելու մեխանիզմի մասին ՌԴ նախագահի կողմից մտցված արձանագրությունը։
Փաստաթուղթը ստորագրվել է Դուշանբեում 2007 թ.-ի հոկտեմբերի 6-ին և կոչված է համակարգել ռազմական նշանակության արտադրանքի տրամադրման կարգը ՀԱՊԿ անդամ-երկրների ԶՈւ ռազմական պատրաստվածությունը վերականգնելու և պահպանելու համար, հաղորդում է «ՌԻԱ Նովոստին»։
Արձանագրության համաձայն, ռազմատեխնիկական օգնություն ցուցաբերելու մասին որոշումը ընդունվում է միաձայն ՀԱՊԿ պետությունների ղեկավարների կողմից Կազմակերպության այն անդամ-պետությունների դիմումի համաձայն, որոնց նկատմամբ հնարավոր է կամ իրագործվում է ագրեսիա։ Այսպիսի օգնության տակ հասկացվում է ռազմական նշանակության արտադրանքի տրամադրում անվերադարձ կամ արտոնյալ հիմունքներով Զինված Ուժերի մարտունակությունը վերականգնելու համար։
Օգնության ֆինանսատնտեսական բաղկացուցիչը սահմանվում է յուրաքանչյուր կոնկրետ դեպքում՝ ելնելով երկրի ունեցած հնարավորություններից։ Նման օգնություն ստացած պետությունը իրավունք չունի վաճառել կամ փոխանցել այդ արտադրանքը կողմնակի արտասահմանյան երկրների։
ՀԱՊԿ կազմում են Ռուսաստանը, Բելառուսը, Ղազախստանը, Ղրղզստանը, Տաջիկստանը և Ուզբեկստանը։
Փաստաթուղթը Պետդումայում ներկայացնելով՝ ՌԴ պաշտպանության առաջին փոխնախարար Ալեքսանդր Կոլմակովը նշեց, որ դրա վավերացումը համապաստասխանում է Ռուսաստանի շահերին, այդ թվում և «հետխորհրդային տարածաշրջանում ռուսական ռազմական ներկայության տեսակետից»։
Պատասխանելով պատգամավորների հարցերին՝ Կոլմակովը նաև հայտնեց, որ ՀԱՊԿ անդամ-պետություններին ռազմատեխնիկական օգնություն ցուցաբերելու շրջանակներում, 2008 թ.-ին Ղրղզստանին 362,5 մլն ռուբլու օգնություն է ցուցաբերվել, Տաջիկստանին՝ 315,47 մլն-ի և Ուզբեկստանին՝ 320 մլն ռուբլու։
«Իհարկե, առաջին հերթին մենք ապահովում ենք մեր քաղաքական ներկայությունը հետխորհրդային տարածաշրջանի պետությունների տարածքում»,- ասաց փոխնախարարը։
Համապատասխանաբար ծրագրվում է ռազմական ուղղվածության միջոցառումների անցկացում, հստակեցրեց Կոլմակովը՝ ավելացնելով, որ «հետագայում մենք պետք է զարգացնենք այդ թեման»։ --0--
