Մոսկվայում տեղի կունենա հայկական մշակույթի և կոնյակի տոն
ԵՐԵՎԱՆ, 13 մայիսի./Նովոստի-Արմենիա/. «ԱՐԱՐԱՏ երկրի գանձերը» անվանումով հայկական մշակույթի և կոնյակի տոն տեղի կունենա Մոսկվայում շաբաթ օրը, հաղորդում է Ռուսաստանի հայերի միության ինտերնետային կայքը։
«Ժողովուրդների բարեկամության հրապարակում՝ Համառուսաստանյան ցուցահանդեսային կենտրոնի կենտրոնական հրապարակում, «Հայաստան» տաղավարի դիմաց վերստեղծվելու է լեգենդար Անին՝ ավելի քան հազար եկեղեցիների քաղաքը և հայկական պատմության բնօրրանը»,- ասվում է հաղորդագրությունում։
Հռչակավոր Առյուծի դարպասների միջով անցնելով՝ այցելուն կհայտնվի անհետացող քաղաքի կենտրոնում, կանցնի նրա առևտրի շարքերով՝ շրջապատված հինավուրց Հայաստանի արհեստի վարպետներով։
Տոնի ժամանակ ներկայացվելու են հայկական խոհանոցի ավանդական կերակրատեսակները և լեգենդար «Արարատ» կոնյակը, հաղորդում է կայքը։
Հյուրերը կտեսնեն նաև ժամանակակից Հայաստանի վաստակավոր գործիչների տոնական համերգը։ Իրենց ստեղծագործությունները կկատարեն լավագույն երաժիշտները, իսկ վարպետ ոսկերիչները և հայտնի մոդելավորողները, որոնք իրենց աշխատանքում համատեղում են ավանդույթը և արդիականը, կցուցադրեն իրենց հավաքածուները։ Ժողովուրդների բարեկամության գունավոր շատրվանների շիթերի վրա, տաղավարների պատերին և էկրաններին նորից կկենդանանան հինավուրց Անիի տներն ու փողոցները։
Ռուսաստանի հայերի կայքի տեղեկատվության համաձայն, տոնի բարձրակետն է դառնալու շլացուցիչ լուսային շոուն։--0—