ԵՐԵՎԱՆ, 21 ապրիլի. /Նովոստի-Արմենիա/. Եվրասիական տնտեսական համագործակցությունը (ԵվրԱզԷս) և Հավաքական անվտանգության պայմանագրի կազմակերպությունը (ՀԱՊԿ) մտադիր են ակտիվորեն համագործակցել միգրացիայի և արտաքին սահմանների պահպանության բնագավառում, տեղեկացրել է ԵվրԱզԷս-ի գլխավոր քարտուղար Թայիր Մանսուրովը։
«Աշխատանքային միգրացիայի խնդիրը մեր կազմակերպության խնդիրն է։ Մենք պետք է ապահովենք նորմալ աշխատանքային միգրացիայի ռեժիմ, որը բնական է, քանի որ շատ երկրներ աշխատուժի կարիք ունեն։ Սակայն առկա է անօրինական միգրացիայի խնդիրը։ Դրանով զբաղվում է ՀԱՊԿ-ն, որն ունի այս հարցում ազդեցության լծակներ։ Այդ պատճառով մենք պետք է միասին լուծենք այս խնդիրները՝ իրավիճակը քաղաքակիրթ տեսքի բերելու նպատակով», - ասել է նա լրագրողներին երկուշաբթի Մոսկվայում՝ ԵվրԱզԷս-ի և ՀԱՊԿ-ի Ինտեգրացիոն հանձնաժողովի քարտուղարությունների համատեղ խորհրդակցությունից հետո։
Մանսուրովի խոսքերով, երկու կազմակերպություններն էլ նման համատեղ խնդիրներ շատ ունեն։
ՀԱՊԿ գլխավոր քարտուղար Նիկոլայ Բորդյուժան իր հերթին նշել է, որ երկու կազմակերպությունները մտադիր են համագործակցել ԵվրԱզԷս-ի և ՀԱՊԿ-ի մասնակից-պետությունների արտաքին սահմանների պահպանության բնագավառում։ Բացի այդ, կողմերը մտադիր են տեղեկատվություն փոխանակել և համագործակցել երկու կազմակերպությունների կողմից մշակվող նորմատիվային փաստաթղթերի փորձաքննության բնագավառում։
ԵվրԱզԷս-ի կազմում են Բելառուսը, Ղազախստանը, Ղրղստանը, Ռուսաստանը, Տաջիկստանը, Ուզբեկստանը։ ՀԱՊԿ-ի կազմում են Հայաստանը, Բելառուսը, Ղազախստանը, Ռուսաստանը, Տաջիկստանը և Ուզբեկստանը։-0-
