Կոսովոյի մասին հայտարարությունը Ռուսաստանի խորհրդարանը կընդունի երեքշաբթի. սենատոր Լիխաչյով
Սերբիայից Կոսովոյի անկախության հռչակման վերաբերյալ Ռուսաստանի խորհրդարանի երկու պալատների՝ Պետդումայի և Դաշնության Խորհրդի համատեղ հայտարարությունը, ամենայն հավանականությամբ, կընդունվի երեքշաբթի՝ փետրվարի 19-ին, «ՌԻԱ Նովոստիին» հայտնել է Դաշնային Խորհրդի՝ միջազգային գործերով հանձնաժողովի նախագահի տեղակալ Վասիլի Լիխաչյովը։
«Հայտարարության տեքստի վրա աշխատանքը գործնականում ավարտված է, և այժմ այն համաձայնեցման փուլում է», - ավելացրել է նա։ Լիխաչյովը հաստատել է, որ այդ հայտարարությունն ընդունվելու է զուգահեռաբար Պետդումայի խորհրդի և խորհրդարանի վերին պալատի խորհրդի կողմից։ Ավելի վաղ տեղեկացվում էր, որ միանգամից երկու պալատների անունից հայտարարությունը կընդունվի երկուշաբթի։
Կիրակի Կոսովոյի խորհրդարանն ընդունել է երկրամասի անկախության մասին հռչակագիրը։ Սերբիան մտադիր չէ ընդունել անկախ Կոսովոյին, այս առնչությամբ հայտարարել է Սերբիայի վարչապետ Վոիսլավ Կոշտունիցան։ Նա խոստացել է Սերբիայի կազմ վերադարձնել Կոսովոն և Մետոխիան։
Ռուսաստանը անընդունելի է համարում երկրամասի կարգավիճակի որոշումը՝ առանց հաշվի առնելու Սերբիայի դիրքորոշումը և պնդում է շարունակել Պրիշտինայի և Բելգրադի միջև բանակցությունները և «ճանապարհային քարտեզի» մշակումը։
ՌԴ ԱԳՆ ակնկալում է, որ Կոսովոյում ՄԱԿ-ի առաքելությունը և ՆԱՏՕ-ի ուժերը գործողություններ կձեռնարկեն՝ Պրիշտինայի իշխանությունների որոշումը չեղյալ հայտարարելու նպատակով։-0-
