ԿԸՀ-ի սահմանափակումների պատճառով ԵԱՀԿ-ն կարող է դիտորդներ չուղարկել ՌԴ նախագահի ընտրություններին

ԵԱՀԿ-ն կարող է հրաժարվել դիտորդներ ուղարկելուց Ռուսաստանում մարտի 2-ին կայանալիք նախագահական ընտրություններին՝ Կենտրոնական ընտրական հանձնաժողովի կողմից դրված սահմանափակումների պատճառով, հայտարարել է ԺՀՄԻԳ/ԵԱՀԿ նախագահ Քերտիս Բադենը, հաղորդում է «ՌԻԱ Նովոստին»։

«Այո, նման տարբերակ հնարավոր է։ ԿԸՀ-ի կողմից սահմանված այժմյա պայմաններում մենք չենք կարող իրականացնել մեր գործառույթները», - ասել է Բադենը «Մոսկովսկի կոմսոմոլեց» թերթին տված հարցազրույցի ժամանակ՝ պատասխանելով այն հարցին, թե արդյոք ԺՀՄԻԳ-ը կարո՞ղ է հրաժարվել նախագահական ընտրությունների մոնիտորինգից, ինչպես հրաժարվեց Պետդումայի մոնիտորինգից։

Կենտրոնական ընտրական հանձնաժողովը ԺՀՄԻԳ դիտորդների համար սահմանել է 70 հոգանոց քվոտա, իսկ առաքելության ժամանման օրը՝ փետրվարի 27-28-ը։

Պետդումայի ընտրությունների ժամանակ ՌԴ ԿԸՀ-ն առաջարկել էր ԺՀՄԻԳ-ին ձևավորել ամենախոշոր առաքելություններից մեկը։ Սակայն սկզբից գրասենյակի ներկայացուցիչները մեղադրել են ԿԸՀ-ը չափազանց փոքր քվոտա տրամադրելու մեջ, իսկ այնուհետև իբր թե վիզաների տրամադրման ուշացման պատճառաբանության ներքո՝ հրաժարվել են դիտորդական առաքելությունից և Ռուսաստան չեն ժամանել։ ԺՀՄԻԳ-ի ներկայացուցչի խոսքերով, գրասենյակը «դիտորդների թվի, ինչպես նաև աշխատանքների ժամանակային լուրջ սահմանափակումներ չի դնում»։

Նրա խոսքերով, առանց  նախապատրաստական աշխատանքի՝ ԵԱՀԿ-ն չի կարող գնահատել դիտորդների ցանկալի քանակը։

«Այժմ արդեն ուշ է խոսել այն  մասին, թե իրականում որքան մարդ կցանկանայինք ուղարկել։ Արդեն այսօր մենք հնարավորություն չունենք իրականացնել աշխատանքը ողջ ծավալով այն սխեմայի համաձայն, որը ես նոր ներկայացրեցի։ Քանի որ մեզ թույլ չեն տվել ուղարկել փորձագետների առաջին երկու խմբերը, ապա «երրորդ խմբի» դիտորդների ստույգ քանակը, որը մենք պետք է ուղարկեինք, չենք կարող որոշել», - ասել է ԺՀՄԻԳ ներկայացուցիչը։-0-