Վրաստանի միասնական ընդդիմությունը մտադիր է հունվարի 13-ին իրականացնել բողոքի զանգվածային գործողություններ

ԵՐԵՎԱՆ, 8 հունվարի./Նովոստի-Արմենիա/.Վրաստանի միասնական ընդդիմությունը հունվարի 13-ին կսկսի բողոքի զանգվածային գործողություններ, եթե Վրաստանի ԿԸՀ-ն չորոշի անցկացնել նախագահական ընտրությունների երկրորդ փուլը, մամուլի ասուլիսում հայտարարել է ընդդիմությունից առաջադրված Վրաստանի նախագահի թեկնածու Լևան Գաչեչիլաձեն։

«Երկրում տեղի է ունեցել ընտրությունների զանգվածային կեղծում»,-մեջբերել է Գաչեչիլաձեի խոսքը «Նովոստի-Գրուզիա» գործակալությունը։

Նրա խոսքերով, չորեքշաբթի 14.00-ին ընդդիմությունը կսկսի հացադուլ, իսկ մինչև հունվարի 13-ը մնացած ժամանակահատվածում ամեն օր մեկական նախազգուշական գործողություն է իրականացնելու։

Բողոքի գործողություններն ընդդիմությունը մտադիր է իրականացնել Հանրային հեռուստատեսության շենքի առջև։ Պահանջների թվում է ընտրությունների երկրորդ փուլի հայտարարումը, «մեդիա-ահաբեկչության» դադարեցումը, ընդդիմությանը ուղիղ եթեր տրամադրելը։

Ցուցարարներին կարող է խանգարել վերջին 70 տարիների ընթացքում Վրաստանում տիրող աննախադեպ  ցուրտը։ Օդերևութաբանների կանխատեսմամբ մոտակա օրերին ջերմաստիճանը դաշտային հատվածներում կընկնի մինչև -15, իսկ լեռնային շրջաններում՝ մինչև -25։

Անցած տարվա նոյեմբերին ընդդիմության կողմնակիցների զանգվածային ցույցերը հանգեցրին ոստիկանության հետ բախումների։ Երկրում արտակարգ իրավիճակ մտցվեց և հայտարարվեցին արտահերթ ընտրություններ։ ԿԸՀ-ի պաշտոնական տվյալներով, քվեաթերթիկների 87,4%-ի մշակումից հետո 52,1%-ով առաջատարը Միխայիլ Սահակաշվիլին է։ Գաչեչիլաձեն հավաքել է ձայների 24,98%-ը։ Նման արդյունքի դեպքում Սահակաշվիլին ընտրություններում հաղթում է արդեն առաջին փուլում։--0--