ԵՐԵՎԱՆ, 21 նոյեմբերի./Նովոստի-Արմենիա/. Հայաստանի ղեկավարությունը քաղաքական որոշում է ընդունել երկրի Եվրասիական զարգացման բանկի համակարգ մտնելու մասին. բանկը Ռուսաստանը և Ղրղզստանը ստեղծել են 2006թ.։ Ինչպես հայտնեցին բանկի մամուլի ծառայությունից, այս մասին չորեքշաբթի հայտարարել է ՀՀ էներգետիկայի փոխնախարար Իոսիֆ Իսայանը, որը գլխավորում է Մոսկվայում ԵԱԶԲ-ի հետ բանակցող մեր հանրապետության պատվիրակությունը, հաղորդում է «ՌԻԱ Նովոստին»։
Հայկական կողմը, ճշտվում է մամլո հաղորդագրությունում, այս կառույցի մասնակիցներին միանալուց հետո արտահայտել է իր շահագրգռվածությունը Երևանում բանկի ներկայացուցչություն բացելու վերաբերյալ։ Սպասվում է, որ այս ուղղությամբ հաջորդ քայլը կդառնա հանրապետության տարածքում բանկի գործունեության պայմանների մասին համաձայնագրի ստորագրումը, ինչպես նաև խորհրդարանի կողմից դրա հաստատումը։
Հայաստանի պատվիրակությունը, ասվում է հաղորդագրության մեջ, ԵԱԶԲ-ին առաջարկել է իր տարածքում մի շարք ներդրումային նախագծեր, առաջին հերթին՝ էներգետիկայի ոլորտում։ Խոսքը, մասնավորապես, կարող է գնալ բանկի, որի կանոնադրական կապիտալը կազմում է 1,5 մլրդ. դոլար, ՀԱԷԿ-ի նոր էներգոբլոկի կառուցման ֆինանսավորման մեջ պոտենցիալ մասնակցության մասին՝ նույն ծավալով։ Հանրապետությունը բանկին առաջարկում է մասնակցել նաև գյուղատնտեսական նախագծերին։ --0—
