Պուտինը վարչապետի պաշտոնում առաջարկում է ֆինանսական հետախուզության ղեկավար Զուբկովի թեկնածությունը

Վլադիմիր Պուտինը, որը չորեքշաբթի ընդունեց Ֆրադկովի կառավարության հրաժարականը, վարչապետի պաշտոնում Պետդումայի քննարկմանն է ներկայացրել Ռոսֆինմոնիտորինգի ղեկավար Վիկտոր Զուբկովի թեկնածությունը, լրագրողներին տեղեկացրել է խորհրդարանի ստորին պալատի խոսնակ Բորիս Գրիզլովը, փոխանցում է «ՌԻԱ Նովոստին»։

«Այսօր ՌԴ Սահմանադրության 83-րդ հոդվածի «ա» կետի համաձայն, նախագահը Պետդումայի քննարկմանն է ներկայացրել Զուբկով Վիկտոր Ալեքսանդրովիչի թեկնածությունը»,-ասել է Գրիզլովը։

Խոսնակը պատգամավորներին առաջարկում է քննարկել Զուբկովին առաջիկա ուրբաթ։

«Վաղը Պետդումայի խորհուրդը կքննարկի, թե երբ պիտի անցկացնի նիստը։ Իմ առաջարկն է՝ առաջիկա ուրբաթ, Պետդումայի մոտակա նիստում»,-ասել է նա։

Խոսնակի խոսքերով, հինգշաբթի Պետդումայի բոլոր խմբակցությունները հնարավորություն կունենան հանդիպել վարչապետի թեկնածուի հետ։

Գրիզլովը նշել է, որ Զուբկովի 30-ամյա մասնագիտական գործունեությունը կապված է եղել Լենինգրադի մարզի հետ։ «Նա ղեկավարել է սովխոզ, ղեկավարել է սովխոզների միավորում, եղել է Պրիոզյորսկ քաղաքի քաղկոմի առաջին քարտուղար, աշխատել է Սմոլնիում»,-ասել է խոսնակը։

Զուբկովը ղեկավարել է նաև Լենինգրադի հարկային տեսչությունը, եղել է հարկերի և հարկահավաքման փոխնախարար, նշել է Գրիզլովը։

«Այսօր, ղեկավարելով Ռոսֆինմոնիտորինգը՝ (Զուբկովը) փաստորեն կառավարում է պետական ֆինանսները»,-ասել է խոսնակը։

Գրիզլովի կարծիքով, Զուբկովի փորձը նրան թույլ կտա ղեկավարել կառավարությունը։

«Նրա կյանքի մեծ ուղին և մասնագիտական գործունեությունը թույլ են տալիս նրան ղեկավարել ՌԴ կառավարությունը»,-ասել է խոսնակը։

Վիկտոր Զուբկովը տնտեսական գիտությունների թեկնածու է, Ռուսական ինժեներական ակադեմիայի թղթակից-անդամ։ Ծնվել է 1941-ի սեպտեմբերի 15-ին Սվերդլովսկի մարզի Կուշիվինյան շրջանի Արբատ գյուղում։--0--