ԵՐԵՎԱՆ, 26 նոյեմբերի. /Նովոստի-Արմենիա/. Հայաստանի նախագահ Սերժ Սարգսյանը, ով շաբաթ վերընտրվեց Հայաստանի հանրապետական կուսակցության ղեկավարի պաշտոնում, շնորհակալություն հայտնեց իրեն ցուցաբերած վստահության համար և հնչեցրեց այն պատճառները, որոնցով առաջնորդվելու է այդ պաշտոնում:
«Մենք մուտք ենք գործում պատասխանատու ժամանակաշրջան և շատ անելիք ունենք: Բայց ունենք ամուր թիմ և հարուստ փորձ: Ես կներկայացնեմ յոթ սկզբունքներ, որոնցով ղեկավարվելու եմ որպես կուսակցության նախագահ, և կուսակցության բոլոր անդամներից կսպասեմ դրանց կատարումը»,- ասաց Սարգսյանը:
Նախևառաջ, պետք է ապահովել երկրի անվտանգությունը: «Մեր ժողովրդի ազատությունը, սեփական երկրում ազատ և անկախ ապրելու իրավունքն ամենագլխավոր արժեքներն են»,- ասաց Սարգսյանը:
«Երկրորդ, ձեր ջանքերն ուղղեք Հայաստանի օրինականության և արադարության ամրապնդմանը: Հիշեք, որ պարտավոր եք լինել օրենքի խոնարհ ծառաներ և օրինականության մարմնավորում», - ասաց նախագահը:
Ըստ նրա, ևս մեկ կարևոր սկզբունք է երկրում անդորրի պահպանումը որպես սահմանում խաղաղության երաշխիք: «Եթե սահմանապահը մեր զինվորն է, ապա Հայաստանի ներսում հանգստության պատասխանատվությունը մենք ենք կրում»,- ընդգծեց Սարգսյանը:
Նա կոչ արեց նաև նոր հնարավորություններ փնտրել հայ ժողովրդի ստեղծագործական ներուժի օգտագործման համար և հոգ տանել Հայաստանի բնակիչների բարեկեցության համար, աշխատանքի և ձեռնարկատիրությամբ զբաղվելու հնարավորություններ ապահովել: «Մենք պետք է խուսափենք քաղաքական, սոցիալական և տնտեսական ցնցումներից, և առաջ շարժվենք»,- նշեց երկրի ղեկավարը:
Նա առաջարկեց կապ ապահովել հայ ժողովրդի անցյալի և ապագայի միջև՝ փառավոր անցյալում տեսնելով ապագա հաջողությունների գրավականը: «Մենք քիչ ենք, բայց մեր պատմությունը քաղաքակրթության ակունքներից է սկիզբ առնում», - ավելացրեց Սարգսյանը:
Եվ վերջապես, նա խորհուրդ տվեց վերաիմաստավորել սեփական ժամանակն ու դրա խնդիրները: «Մի ձգտեք իշխանության, եթե պատրաստ չեք անձնուրաց ծառայության: Իշխանությունը վայելք չէ, այլ ծանր բեռ: Փորձեք լուծել ձեր առջև կանգնած խնդիրները, իսկ ապագան թողեք ապագա սերունդներին»,- եզրափակեց Սարգսյանը:
-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
