Փորձագետ. սոցցանցային կրքերը չեն ազդել ՀՀ ընտրությունների ընթացքի վրա

ԵՐԵՎԱՆ, 3 ապրիլի./Նովոստի–Արմենիա/. Սոցցանցերի, մասնավորապես, Facebook–ի հայ օգտատերերի ակտիվությունն էական ազդեցություն չի թողել Հայաստանի խորհրդարանական ընտրությունների ընթացքի վրա, կարծում է «Ինտերնետ հանրություն» հասարակական կազմակերպության փոխնախագահ Գրիգորի Սաղիյանը:

«Բոլոր քաղաքական ուժերն ակտիվ օգտվել են Facebook-ի «բարիքներից»` ստեղծում էին էջեր, բանավեճեր անցկացնում և այլն: Սակայն այդ ամենը իրականության` ընտրությունների ընթացքի վրա արդյունավետ ազդեցություն չթողեց», - ասաց նա երկուշաբթի մամուլի ասուլիսի ժամանակ:

Սաղիյանի խոսքով, Հայաստանում ինտերնետ հանրությունը ապրում է «լիովին այլ իրականությունում»: «Չնայած, որ երկրում ինտերնետ տարածքը բաց է, իսկ ցանցերի օգտատերերը կարող են բավական ազատ արտահայտել իրենց մտքերը, այդուհանդերձ, նման ազատությունը հեռու է «արտաֆեյսբուքյան» իրականությունից», - փաստեց փորձագետը:

Ապրիլի 2–ին հանրապետությունում անցկացվեցին վեցերորդ գումարման խորհրդարանի ընտրությունները, որոնց մասնակցում էր հինգ կուսակցություն և չորս դաշինք։ Այս ընտրություններն ուշագրավ են նրանով, որ երկրի պատմության մեջ առաջին անգամ քվեարկությունը տեղի է ունենում 100 տոկոսանոց համամասնական համակարգով: Այս ընտրություններն առաջին համապետական ընտրություններն են 2015 թ.-ի սահմանադրական փոփոխություններից հետո, որոնք նախատեսում են անցում խորհրդարանական իշխանավարման գործող նախագահի լիազորությունների ժամկետի ավարտից հետո` 2018 թ.–ին։

Ինչպես երկուշաբթի ԿԸՀ արտահերթ նիստի ժամանակ հայտարարեց ԿԸՀ նախագահ Տիգրան Մուկուչյանը, քվեարկության նախնական տվյալների համաձայն, իշխող ՀՀԿ–ն հավաքում է ձայների 49,12 տոկոսը, «Ծառուկյան» դաշինքը` 27, 32 տոկոսը, «Ելք» դաշինքը` 7,77 տոկոսը, ՀՅԴ–ն` 6,57 տոկոսը։

Խորհրդարան անցնելու համար սահմանված է շեմ, որը կուսակցությունների համար կազմում է 5 տոկոս, դաշինքների համար` 7 տոկոս։

Միաժամանակ, «Հայկական վերածնունդը» հավաքում է ձայների 3,71 տոկոսը, «Օհանյան–Րաֆֆի–Օսկանյան» դաշինքը` 2,07 տոկոսը, «Կոնգրես–ՀԺԿ» դաշինքը` 1,65 տոկոսը, «Ազատ դեմոկրատներ» կուսակցությունը`0,94 տոկոսը, Հայաստանի կոմունիստական կուսակցությունը` 0,75 տոկոսը։ Վերջիններս չեն հաղթահարել անցողիկ շեմը: -0-