ԵՐԵՎԱՆ, 12 հունիսի./Նովոստի–Արմենիա/. Սյունիքի մարզում խոզերի անկումը, ստուգման նախնական տվյալներով, հավանաբար, տեղի է ունեցել կերային ինֆեկցիայի հետևանքով, «Նովոստի–Արմենիա» գործակալությանը հայտնեց Հայաստանի Սննդամթերքի անվտանգության պետական ծառայության մամուլի քարտուղար Անուշ Հարությունյանը։
Հունիսի 6–ին Սյունիքի մարզի Կոռնիձոր համայնքում գրանցվել է խոզերի զանգվածային անկում։ Տեղի բնակիչներից մեկը հայտնել է, որ 400 խոզից մնացել է ընդամենը 10 գլուխ։ Նա ենթադրել է, թե անկման պատճառը խոզի աֆրիկյան ժանտախտն է, որը տարածված է նաև մյուս հարակից գյուղերում։
«Լաբորատոր ստուգման արդյունքները ցույց են տվել, որ սրանք անաերոբ ինֆեկցիաներ են, կան նաև սալմոնելներ։ Ամենայն հավանականությամբ, կերով ներթափանցած բակտերիաները խոզերի մոտ հիվանդություն են առաջացրել»,– ասաց Հարությունյանը։
Նա նշեց, որ այս պահին հետազոտությունները շարունակվում են։ Հարությունյանը խորհուրդ տվեց խոզերին հնարավորինս հեռու պահել միմյանցից, քանի որ ինֆեկցիան կարող է փոխանցվել չվարակված կենդանիներին։ Նա նաև նշեց, որ առայժմ հստակ չէ, թե կերի որ տեսակներն են վարակի փոխանցող, այդ իսկ պատճառով պետք է զգուշություն դրսևորել։
Հարությունյանը վստահեցրեց, որ վարակված կենդանիների մսի վաճառքի վտանգ չկա։
«Երբ խոզերն այսպիսի ինֆեկցիաներով են վարակվում, դրանց անկումը շատ արագ է տեղի ունենում, չեն հասցնում մորթել և վաճառել։ Իսկ անկման դեպքում խոզերին ոչնչացնում են։ Այնպես որ, վարակված խոզերի մսի վաճառքի վտանգ չկա»,– ամփոփեց նա։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում