Նախատեսում ենք աշխատանքները սկսել այս տարվա վերջ. Մեսչյանը ներկայացրել է ճոպանուղու կառուցման մանրամասները

ԵՐԵՎԱՆ, 15 մայիսի./Նովոստի–Արմենիա/. Օտարերկրյա ներդրողներ կարող են ներգրավվել Երևանում ճոպանուղու կառուցման գործում։ Չորեքշաբթի ասուլիսի ժամանակ ասաց Երևանի գլխավոր ճարտարապետ Արթուր Մեսչյանը։

«Քաղաքապետարանը, ցավոք, չունի բավականին բյուջետային միջոցներ ճոպանուղի կառուցելու համար, և մենք նախատեսում ենք ներդրողներ ներգրավել` թույլ տալով նրանց կառուցել մոլ Երկրորդ մասիվի տարածքում և հյուրանոցային համալիր` Աբովյանի պուրակի հարևանությամբ», – ասաց նա։

Նրա խոսքով, ճոպանուղին կկապի Նոր Նորք համայնքն ու կենտրոնը, վերջին կայարանը կլինի Աբովյանի պուրակի մոտ` նախկին Երիտասարդության պալատից («Կուկուռուզնիկ») ոչ հեռու։ 

«Օրերս պատրաստվում ենք հանդիպել Սանկտ Պետերբուրգի քաղաքապետարանի ներկայացուցիչների հետ` այդ տարածքում ճոպանուղու կայարանի կառուցման նախագծի իրականացման հարցը քննարկելու համար», – ասաց նա` չբացառելով, որ հյուրանոցային համալիրի և կայարանի կառուցումը կդառնա հայ–ռուսական համատեղ նախագիծ։ 

Մեսչյանը նաև նշեց, որ ճոպանուղին չի լինի բացառապես զբոսաշրջային օբյեկտ, այն նախատեսված կլինի հենց քաղաքի տրանսպորտային ցանցի համար և պետք է ապահովի քաղաքացիների տեղաշարժը։ Այդ պատճառով ճոպանուղին կունենա մեծ թվով վագոններ` ավելի քան 10 նստատեղով։

«Քանի որ ճոպանուղու կառուցումն ավելի էժան է, քան մետրոպոլիտենի կայարանի կառուցումը, ապա մենք նախատեսում ենք աշխատանքները սկսել արդեն այս տարվա վերջին։ Առաջին հերթին կկառուցվեն ճոպանուղու հենասյունները, ինչից հետո կստեղծվի ենթակառուցվածքը», – ասաց նա։ 

Մեսչյանի խոսքով, հետագայում հնարավոր կլինի ընդլայնել ճոպանուղին դեպի «Հաղթանակի» զբոսայգի (Զեյթուն վարչական շրջան)։–0–