ԵՐԵՎԱՆ, 4 նոյեմբերի. /Նովոստի-Արմենիա/. Հայաստանի առողջապահության նախարարը Հայաստանում բժշկական ծառայությունների պետպատվերի ոլորտում հեղափոխական մոտեցում է առաջարկել։
«Պետպատվերի համակարգը հետվճարային կդառնա։ Ոչ թե հիվանդը «կհետևի» ֆինանսավորմանը պետպատվերի շրջանակում, այլ հակառակը` միջոցները «կհետևեն» հիվանդին, որ ինքնուրույն կկարողանա ընտրել բժշկական հաստատությունը»,– ասաց Ալթունյանն ուրբաթ խորհրդարանում բյուջետային լսումների ժամանակ։
Ինչ վերաբերում է կոռուպցիոն ռիսկերին, բուժհաստատության և հիվանդի միջև հնարավոր գործարքներին, ապա, նրա խոսքով, դրա դեմ կարելի է քայլեր ձեռնարկել։ «Դիմումների 10 տոկոսը կստուգվի պատահական ընտրության սկզբունքով»,– առաջարկում է Ալթունյանը։
Նա հայտնեց, որ առաջիկա ամսում կավարտվեն ֆինանսավորման նոր համակարգի մշակման աշխատանքները, ինչից հետո այն կներկայացվի կառավարության ուշադրությանը։
«Այսօր գործող ֆինանսավորման համակարգը չի խրախուսում բժշկական հաստատությունների զարգացումը, այլ հակառակը, խոչընդոտոմ է դրան։ Նոր համակարգը կնպաստի արդյունավետ բուժհաստատությունների բարգավաճմանը, իսկ վատերը կփակվեն։ Հիվանդը «կքվեարկի ոտքերով»»,– ասաց Ալթունյանը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
