Մանկահասակ որդին` դանակահարության պատճառ Գյումրիում

ԵՐԵՎԱՆ, 30 մարտի. /Նովոստի–Արմենիա/. Հենրիկ Հովհաննիսյանին հինգից տասը տարվա ազատազրկում է սպառնում նախկին կնոջը, կնոջ քրոջը և նախկին զոքանչին դանակահարելու համար, հայտնում է դատական տեղեկատվական համակարգը։

«2016թ. հունվարի 3-ին ժամը 11:00-ի սահմաններում, Գյումրի քաղաքի Աթարբեկյան փողոցի իր 96-րդ տան դիմաց, մանկահասակ որդուն տեսակցելու հարցի շուրջ վիճաբանել է իրեն այցելած նախկին կնոջ` Անի Գրիգորյանի հետ, որի ընթացքում դիտավորությամբ իր մոտ` բաճկոնի գրպանում պահած դանակով մի քանի անգամ հարվածներ է հասցրել Անի Գրիգորյանին, բաժանելու նպատակով միջամտած վերջինիս քրոջը` Հերմինե Գրիգորյանին և մորը` Լիաննա Գրիգորյանին»,– ասվում է հաղորդման մեջ։

Հովհաննիսյանն Անի Գրիգորյանին պատճառել կյանքին վտանգ սպառնացող ծանր վնաս, Հերմինե Գրիգորյանի առողջությանը` կարճատև քայքայող թեթև վնաս, իսկ Լիաննա Գրիգորյանին` առողջությունը կարճատև քայքայող վնաս:

Հենրիկ Հովհաննիսյանին մեղադրանք է առաջադրվել ՀՀ ՔՕ 112–րդ հոդվածի 1–ին մասով` Դիտավորությամբ մեկ ուրիշին մարմնական վնասվածք պատճառելը կամ առողջությանն այլ ծանր վնաս պատճառելը, որը վտանգավոր է կյանքի համար։ Որպես խափանման միջոց ընտրվել է կալանավորումը։

Գործով դատական քննությունը կկայանա չորեքշաբթի` մարտի 30–ին։ -0-