Հայաստանում ընտրակաշառքի չափն աճել է 10 անգամ

ԵՐԵՎԱՆ, 31 հունվարի. /Նովոստի-Արմենիա/. Խորհրդարանական ընտրություններին ընդառաջ բազմակի անգամ մեծացել է Հայաստանի բնակիչներին առաջարկվող ընտրակաշառքի չափը, գրում է «Ժողովուրդ» թերթը։

Պարբերականի գրառման մեջ նշվում է, որ թերթի խմբագրությունը պարբերաբար ահազանգեր է ստանում այն մասին, որ իշխող կուսակցությունը արդեն սկսել է ակտիվորեն նախապատրաստվել կեղծիքներին։

«Մասնավորապես վարկանշային ընտրակարգով առաջադրվող պոտենցիալ թեկնածուներն ու նրանց թիմերի ներկայացուցիչները սկսել են մարդկանց տուն այցելել՝ ՀՀԿ-ական թեկնածուների օգտին քվեարկելու դեպքում խոստանալով գումար տալ», - գրում է պարբերականը:

Պարբերականը նշում է, որ ապագա ընտրակաշառքների գները հասնելու են ընդհուպ մինչև 100 ԱՄՆ դոլարի (գրեթե 50 հազար դրամ)։ Հիշեցնենք, որ պտտվող լուրերի համաձայն, նախորդ ընտրություններին այդ գումարը կազմում էր 5-10 հազար դրամ:

Հերթական խորհրդարանական ընտրությունները Հայաստանում նշանակված են 2017 թ.-ի ապրիլի 2-ին, սակայն ամսաթիվը կարող է տեղափոխվել: -0-