ԵՐԵՎԱՆ, 4 դեկտեմբերի. /Նովոստի-Արմենիա/. Հայաստանի կառավարությունը աշխատում է նախադպրոցական, դպրոցական և բուհական կրթության ոլորտի փոփոխությունների շուրջ, հայտարարեց ՀՀ վարչապետ Կարեն Կարապետյանը՝ նախօրեին հայկական բարեգործական ընդհանուր միության (AGBU) կազմակերպած քննարկման ընթացքում:
«Մենք քննարկումներ ենք անցկացրել դպրոցում բնական գիտությունների հանդեպ հետաքրքրությունը բարձրացնելու հարցի շուրջ: Քննարկվում է միջին դպրոցներում 6-7-րդ դասարաններում ֆինանսական դաստիարակության առարկաների ներդրումը: Ես նմանատիպ փոփոխությունների կողմնակից եմ», - ասաց նա՝ պատասխանելով կրթության ոլորտում բարեթոխումների վերաբերյալ հարցին:
Ընդ որում, կառավարության ղեկավարն այն կարծիքի կողմնակիցն է, որ կրթական ոլորտում պայմանները պետք է բոլորի համար հավասար լինեն:
«Վիճակագրության համաձայն, Հայաստանում տաղանդավոր մարդկանցից շատերը գյուղական համայնքներից էին, և շրջանների երեխաներին կրթություն ստանալու հնարավորություն չտալ, նշանակում է խնդիրներ ունենալ ապագայում», - ընդգծեց նա:
Շուկայում այս կամ այն մասնագիտության պահանջարկի համատեքստում Կարապետյանը նշեց, որ դա կախված է ոչ միայն կրթական ոլորտի, այլ նաև այլ ոլորտների բարեփոխումներից: Այս կապակցությամբ նա օրինակ բերեց ՏՏ ոլորտը, որի մասնագետներին առաջարկվել էր ներկայացնել իրենց տեսլականը, թե ինչպիսի բարեփոխումներ են անհրաժեշտ և ինչպիսի մասնագետներ են նրանց պետք:
Քննարկումը, որը հեռարձակվում էր առցանց ռեժիմով ընկերության կայքում, կազմակերպվել է AGBU 110-ամյակի շրջանակում և նվիրված էր Հայաստանի սոցիալ-տնտեսական երկարաժամկետ զարգացման հարցերին: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
